Шавкат Мирзиёев раислигида ислоҳотлар натижадорлиги, ҳудудларда ишларнинг бориши, аҳолини ўйлантираётган масалаларга ечим топиш юзасидан видеоселектор йиғилиши ўтказилди.

Унда йил бошидан ҳудудларда буджетга тушум 26 фоизга ўсгани қайд этилди. Лекин Қорақалпоғистон, Жиззах, Қашқадарё ва Хоразмда ўсиш мамлакат бўйича ўртача кўрсаткичга ҳам чиқмаган.

Ер, мол-мулк ва сув солиқлари маҳаллий бюджетда қолдирилаётганига қарамай, фақат шу солиқларни уйма-уй юриб ундиришга солиқчиларнинг 70−80 фоиз вақти сарфланмоқда.

«Бу 1 сўм солиқ йиғиш учун 2 сўм ресурс сарфлаш билан баробар эмасми?», — деди президент.

Солиқ қўмитаси раҳбарияти, вилоят, туман солиқ раҳбарлари телевидение, газета, ижтимоий тармоқларда чиқиб, солиқ тўлаш мажбурият эмас, конституциявий бурч эканини тушунтирса, солиқларни одамларни ўзи тўлаши таъкидланди.

Агар маҳалладаги солиқчи бунга кетган вақтини солиқ базасини кенгайтиришга сарфласа, тушум карра-карра ошиши қайд этилди.

Президент мутасаддиларга маҳаллада ер, мол-мулк, сув солиқларини ундиришнинг янги механизмини ишлаб чиқишни топширди.