Хитойда мия имплантини жойлаштириш бўйича биринчи операция ўтказилди
Хитой Фанлар академияси қошидаги CEBSIT маркази Фудан университети билан ҳамкорликда симсиз инвазив нейрокомпъютер интерфейси тизимининг синовларини ўтказмоқда.
Хитойда мия имплантини жойлаштириш бўйича биринчи операция муваффақиятли ўтказилди, дея хабар бермоқда Global Times нашри.
2025 йилнинг март ойида барча оёқ-қўлларини йўқотган беморга мия имплантати ўрнатилди. Жарроҳлик амалиётидан «бир неча ҳафта» ўтгач, бемор «фикр кучи» билан электрон қурилмаларни бошқара бошлади. Масалан, у компьютерда пойга симуляторлари ва шахмат ўйинларини ўйнай олди.
Хитой Фанлар академияси қошидаги CEBSIT маркази Фудан университети билан ҳамкорликда симсиз инвазив нейрокомпъютер интерфейси (BCI) тизимининг синовларини ўтказмоқда. Ушбу технологияни 2028 йилгача бозорга чиқариш режалаштирилган.
Хитой АҚШдан кейин мия чипини муваффақиятли синовдан ўтказган иккинчи мамлакат бўлди. Нашрнинг таъкидлашича, CEBSIT ишланмаси Илон Маск асос солган Neuralink компанияси тизимига нисбатан «бир қатор афзалликларга» эга экан.
Хусусан, Хитой чипи дунёдаги «энг кичик» мия имплантати бўлиб қолди: унинг диаметри 26 мм, қалинлиги эса 6 мм дан кам. Имплантнинг эгилувчанлиги Neuralink аналогидан «100 баробар юқори» экан. Ишлаб чиқарувчиларнинг таъкидлашича, шу туфайли мия ҳужайралари чипни бегона жисм сифатида «деярли сезмайди».
2016 йилда асос солинган Neuralink мияни компьютер билан бевосита боғлаш учун интерфейслар ишлаб чиқармоқда. Компания 2024 йил бошида инсонда ўтказилган илк операция ҳақида маълумот берганди.
Иккинчи беморнинг жарроҳлик амалиёти ҳақида Илон Маск 2024 йил августда хабар қилди. Учинчи беморга имплант ўрнатилгани 2025 йил январда маълум бўлди.
Blindsight — «Телепатиядан кейинги Neuralink маҳсулоти». 2024 йил мартида Маск имплант «аллақачон маймунларда ишлаб турибди» деб маълум қилди. Сентябрда Neuralink Blindsight имплантини синаш учун кўнгиллиларни излай бошлаган эди.
