Шавкат Мирзиёев 10 июнь куни Самарқанд вилояти туманларини комплекс ривожлантиришга қаратилган янги чора-тадбирлар тўғрисидаги қарорни имзолади. Бу ҳақда Адлия вазирлигининг Ҳуқуқий ахборот канали хабар берди.

Ҳужжат туризм соҳасини ривожлантириш бўйича бир қатор чора-тадбирларни, жумладан, қўшимча субсидиялар ва солиқ кешбекларини ўз ичига олади. Жорий йилдан бошлаб ҳар йили июнь август ойларида «Очиқ туризм мавсуми» дастури ўтказилади. Дастур доирасида туроператорлар ва меҳмонхоналар тўланган қўшилган қиймат солиғининг 50 фоизини кешбек шаклида қайтариб олишлари мумкин.

Шунингдек, Ўзбекистон резидентлари бўлган туроператорлар хорижий сайёҳларни жалб қилганликлари учун бюджетдан тўловлар оладилар. Тўловлар миқдори ҳар минг саёҳатчи учун 5000 долларни ташкил этади.

Ўзбекистонга янги рейсларни йўлга қўяётган маҳаллий ва хорижий авиакомпаниялар парвозларни ташкил этиш харажатларининг бир қисмини қоплаши мумкин бўлади. Бундан ташқари, ташувчиларга республикага жалб қилинган ҳар бир ички сайёҳ учун $100 берилади.

Ижтимоий тармоқларда обуначилари сони 5 млн ва ундан ортиқ бўлган 50 нафар хорижий блогерлар 7 кунлик бепул сайёҳлик дастурларидан фойдаланишлари мумкин.

Ўзбекистонни жаҳоннинг йирик сайёҳлик платформаларида тарғиб қилиш харажатлари қоплаб берилади.

Давлат раҳбари жорий йил март ойида Самарқанд вилоятини ривожлантиришга бағишланган йиғилишда «Очиқ туризм мавсуми» дастури ишга туширилишини маълум қилган эди. Ўшанда у глобал туризм соҳасидаги ноаниқликлар фонида Ўзбекистонни хавфсиз саёҳат йўналиши сифатида тарғиб қилиш кампаниясини бошлашни буюрган эди.

10 июнь куни бўлиб ўтган йиғилишда президент вилоятда туризм инфратузилмасини ривожлантириш бўйича қатор ташаббусларни маъқуллади. Самарқанднинг тарихий марказида 13 та пиёдалар кўчасини ташкил этиш, шунингдек, вилоятдаги меҳмонхоналар сонини 85 тага етказиш режалаштирилган. Йиллик туристик хизматлар ҳажми $750 млнгача ўсиши кутилмоқда.