Ўзига кредит ажратилишини тақиқлаш имконияти пайдо бўлди

Жисмоний шахслар учун ўз маълумотларини кредит битими тузиши тақиқланган шахслар реестрига киритиш хизмати ишга тушди. «Кредит-ахборот таҳлилий маркази» хизмат бепул эканини ва у одамларга ўзининг хабарисиз кредитлар расмийлаштирилиши ҳолатларининг олдини олишини қайд этган.

«Кредит-ахборот таҳлилий маркази» кредит бюроси 6 июндан бошлаб жисмоний шахсларга ўзига кредит ажратилишини тақиқлаш имконини берувчи хизмат ишга туширилганини маълум қилди.

Яъни, бюро «жисмоний шахслар тўғрисидаги маълумотларни кредит битими тузиши тақиқланган шахслар реестрига киритиш ёки реестрдан чиқариш бўйича» хизматни жорий қилган.

Мазкур хизмат орқали жисмоний шахслар ўзларининг иштирокисиз ёки хабарисиз кредит битими расмийлаштирилишининг олдини олиш учун ўзи билан кредит битимини тузишни кредит бюросига ариза киритиш орқали тақиқлаш имкониятига эга бўлади.

«Бу ўз навбатида бугунги кунда ўсиб бораётган жисмоний шахсларнинг хабарисиз кредитлар расмийлаштирилиши ҳолатларининг олдини олишга туртки бўлади. Ушбу хизмат бепул бўлиб, ундан дастлаб Кредит бюросининг расмий веб-сайти орқали фойдаланиш мумкин», — дейилади хабарда.

Эслатиб ўтамиз, 4 март куни президент томонидан имзоланган қонун билан «Кредит ахбороти алмашинуви тўғрисида»ги қонунга ўзгартириш ва қўшимчалар киритилганди. Қонун қуйи палата томонидан 15 январь куни қабул қилинган. Сенат 20 февраль куни маъқулланган.

Ҳужжатга кўра, жисмоний шахс ўзининг иштирокисиз ёки хабарисиз кредит битими расмийлаштирилишининг олдини олиш учун ўзи билан кредит битимини тузишни кредит бюросига ариза киритиш орқали тақиқлаши мумкин. Кредит битимини тузишни тақиқлаш ёки бундай тақиқни олиб ташлаш ихтиёрий амалга оширилади.

Бунинг учун кредит битими тузиш тақиқланган шахслар реестри жорий этилади. Кредит битими тузиши тақиқланган шахслар реестри кредит битими тузиши тақиқланган жисмоний шахслар тўғрисидаги ахборотни ўз ичига олган ва кредит бюролари томонидан юритиладиган ягона маълумотлар базаси ҳисобланади.

Бундай шахсларнинг ўзаро мувофиқлаштирилган реестрини кредит бюролари томонидан юритилиш тартибини Марказий банк белгилайди.

Қонун билан кредит ташкилотларига шахснинг кредит олиш ҳуқуқи мавжудлигини текшириш мажбурияти юкланди. Агар фуқаро кредит олишдан воз кечган бўлса, унга кредит ажратиш ноқонуний ҳисобланади.

Gazeta’даги маълумотларга кўра, 2023 йилда 2790 нафар фуқаронинг номига уларнинг хабардорлигисиз 19 миллиард сўмлик кредитлар берилган, 2024 йилнинг саккиз ойида эса 874 нафар жисмоний шахс жабрланган, уларга 36,6 миллиард сўм маблағ ажратилган.

Koʻrishlar soni: 15