Божхона қўмитаси шахсий автотранспорт воситаларини ишончнома орқали ўзгалар тасарруфига берган фуқароларни огоҳлантирди. Бу ҳақда қўмита матбуот котиби Ҳусан Тангриев хабар берди.

Унинг қайд этишича, охирги вақтларда Ўзбекистонда рўйхатдан ўтган енгил автомобилларни давлат чегара ўтказиш пунктлари орқали ишончнома орқали олиб чиқиб, сўнгра уларни сотиб юбориш ҳолатлари учрамоқда. Божхона қўмитасининг тезкор тузилмалари томонидан бу каби ҳолатларни вақтида аниқлашга қаратилган тезкор-қидирув тадбирлари амалга оширилмоқда.

Хусусан, жорий йилнинг 28 январь куни Қозоғистон билан чегарадаги Малик (Сирдарё) чегара божхона пости орқали қўшни давлат фуқароси бошқарувида Қозоғистон рақами остида Lacetti автомобили кириб келган.

Ваҳолангки, мазкур автомобиль 2024 йилнинг 24 июнь куни ушбу пункт орқали Ўзбекистон давлат рақами остида Ўзбекистон фуқароси томонидан ишончнома асосида олиб чиқилган. Натижада, ушбу автотранспорт воситаси қидирувда эканлиги фош қилинди.

Шу каби ҳолат Ғишткўприк (Жибек Жоли) чегара божхона постида ҳам аниқланди. Бу ҳолатда ҳам қўшни давлат фуқароси бошқарувидаги Қозоғистон давлат рақами остидаги Cobalt автомобили 6 январь куни чегара орқали Ўзбекистонга кириб келган.

Ушбу автомобиль ўтган йилнинг 19 апрель куни Ўзбекистон фуқароси томонидан ишончнома асосида Ўзбекистон давлат рақами билан Яллама пости орқали олиб чиқилган. Бу автомобиль ҳам қидирувда бўлган.

28 март куни Сирдарё вилоятидаги Ховособод чегара пости орқали Тожикистондан кириб келган давлат рақами остидаги Chevrolet Menlo, 3 май куни Сурхондарёдаги Сариосиё пости орқали мамлакатга кирган Volkswagen Cross русумли автомобиллари қидирувда бўлгани аниқланди.

Мазкур транспорт воситаларидан бири ўтган йилнинг 27 ноябрь куни Тошкент вилоятидаги Ойбек чегара пости, иккинчиси эса Фарғона вилоятидаги Андархон пости орқали ишончнома остида олиб чиқилган, Ўзбекистонда рўйхатдан ўтган автомобиллар эканлиги аниқланди. Барча ҳолатлар бўйича процессуал тартибда ҳужжатлар расмийлаштирилди.

Автомобилларни ижарага бериш (rent car) билан шуғулланувчи компаниялардан 6 нафар фуқаро томонидан ижара шартномаси ҳамда ишончнома асосида олинган 100 га яқин транспорт воситалари чегара постлари орқали олиб чиқиб кетилиб, қўшни давлатларда сотиб юборилган.

Мазкур ҳолатлар бўйича Божхона қўмитаси тузулмалари томонидан кенг қамровли тезкор қидирув тадбирлари ташкил этилиб, ҳолатга аниқлик киритиш учун қўшни мамлакатлар божхона хизматлари билан биргаликда иш олиб борилмоқда.

Шунингдек, Ҳусан Тангриев жорий йилнинг ўтган беш ойи давомида мамлакат чегараси орқали жами 800 мингга яқин енгил автомобиллар ҳаракатланганини маълум қилди.

«Божхона ходимлари ҳайдовчиларнинг шахсни, автотранспортнинг рўйхатдан ўтганлигини тасдиқловчи ҳужжатлар, зарур ҳолларда, автомобиль бошқа шахслар томонидан чегарадан олиб чиқилаётганда автомобиль эгасининг ишончномаси мавжудлиги текширилади. Агар автомобиль қидирувга берилган бўлса, улар ахборот тизимлари орқали аниқланиб, тўхтатиб қолинади», — деди у.

Божхона қўмитаси фуқароларни ҳушёрллика чақириб, ишончнома асосида берилган автомобилларни қайтариб олишда муамолар кузатилаётган бўлса, ҳуқуқни муҳофаза қилувчи органларга мурожаат қилишни сўради.