2025 йилнинг биринчи ярим йиллиги якунига кўра, уй-жой сотувлари ўтган йилнинг шу даврига нисбатан 10,6%га ошиб, 136,5 минг хонадонни ташкил этди. Бу ҳақда Иқтисодий тадқиқотлар ва ислоҳотлар маркази таҳлилида қайд этилган.

Июнь ойи якунига кўра, 21 мингта кўчмас мулк олди-сотди битимлари рўйхатдан ўтказилди, бу ўтган йилнинг шу даврига нисбатан 3,7%га кўпдир.

Биринчи ярим йиллик якунлари бўйича кўчмас мулк бозоридаги ҳудудий динамика барқарор ўсишни кўрсатмоқда.

Фаолликнинг энг сезиларли ўсиши Жиззах (29,9%), Навоий (18,3%) ва Сурхондарё (17,7%) вилоятларида қайд этилди. Шу билан бирга, Тошкент вилоятида битимлар ҳажми бироз камайгани (2,6%) кузатилди.

Тошкентда кўчмас мулк бозори

Тошкент шаҳрида иккиламчи уй-жойнинг ўртача нархи ўтган йилнинг шу даврига нисбатан 4,8%га пасайгани қайд этилди, янги қурилган уйлар сегментида эса нархлар атиги 1,6%га камайди.

Ўтган йилнинг июнь ойидан буён пойтахтдаги иккиламчи уй-жой нархларининг энг катта пасайиши Мирзо Улуғбек (-7,6%), Яшнобод (-7,3%) ва Чилонзор (-6,9%) туманларида кузатилди.

Бирламчи уй-жой нархларининг энг сезилари пасайиши Учтепа (-9,7%), Юнусобод (-8,8%) ва Шайхонтоҳур (-7,7%) туманларида қайд этилди.

Тошкентда уй-жой ижараси

Июнь ойида Тошкент шаҳрида ижара нархларининг барқарорлиги кузатилди. Ўртача ижара нархи ўтган ойдаги кўрсаткични сақланиб қолди ва бир квадрат метр учун $8,1ни ташкил этди.

Пойтахтнинг Миробод, Шайхонтоҳур ва Яккасарой туманларида ижара нархи нисбатан юқорилигича қолмоқда. Ушбу туманларда ижара нархи бир квадрат метр учун ўртача $10,3 ни ташкил этади.

Йиллик ҳисобда ўртача ижара нархлари 2,6%га пасайди. Энг сезиларли пасайиш Учтепа, Яшнобод ва Чилонзор туманларида қайд этилди.

Иккиламчи кўчмас мулк бозори

Жорий йилнинг июнь ойида Ўзбекистонда иккиламчи бозорда уй-жойларнинг ўртача нархи ўтган ойга нисбатан 0,3%га ошди. Йиллик ҳисобда ўсиш 1,8%ни ташкил этди.

Ҳудудлар кесимида Жиззах вилояти июнь ойида уй-жой нархларининг бироз пасайганига (-1,3%) қарамасдан, йиллик ўсиш суръати бўйича етакчиликни сақлаб турибди (11,7%).

Шу билан бирга, йиллик ҳисобда ижобий динамика Сурхондарё (10,9%), Хоразм (7,3%) ва Наманган (7,1%) вилоятларида, шунингдек, Қорақалпоғистон Республикасида (9,3%) ҳам қайд этилди.