Киритилган ўзгартишлар қуйидагиларни таъминлашга қаратилган:

Кредит берилмаган ҳолда ошкораликни таъминлаш 

Энди, ипотека кредити ажратиш рад этилган тақдирда, банк ушбу қарор қабул қилинган кундан бошлаб уч иш куни мобайнида қарз олувчига рад этиш сабаблари аниқ баён этилган ёзма хабарномани тақдим этиши шарт. Илгари эса қарз олувчига фақат тушунтиришларсиз қарор нусхаси юборилар эди.

Кредит беришда қарз юкини инобатга олиш 

Энди, ипотека кредити бериш тўғрисида қарор қабул қилишдан аввал қарз олувчининг мавжуд қарз юкини ҳисоблаш мажбурий талаб сифатида жорий этилди. Ҳисоблаш Банкларга ўрнатиладиган макропруденциал нормативлар ҳамда улар томонидан бериладиган кредитлар (микроқарзлар) бўйича тўловларнинг энг юқори қийматларига доир талаблар тўғрисидаги низом асосида амалга оширилади. Бу ўзгартиш илгари тавсия этилган ёндашувни расмийлаштиради. Унга кўра, банклар кредит беришда қарз олувчининг бюджетига бўлган юкни инобатга олиши, ортиқча муддатли кредитлаш ва молиявий босимга йўл қўймаслиги лозим эди.

Кредит ва гаров нисбатини ҳисоблаш

Агар ипотека объекти банк талабларига жавоб берса, муассаса кредит суммаси ва гаров қиймати ўртасидаги нисбатни ҳисоблаши шарт. Бу кўрсаткич ипотека кредити бўйича индивидуал параметрларни белгилашда қўлланилади ва шунингдек 3618-сонли Низом билан тартибга солинади. Гаров қиймати баҳолаш хулосаси (баҳолаш қиймати) ёки кўчмас мулкни харид қилиш-шартномасида кўрсатилган нарх асосида амалга оширилиши мумкин. Илгари бундай ҳисоб-китоб амалга оширилган бўлса-да, гаров қийматини баҳолаш усуллари аниқ норматив асосда мустаҳкамланмаган эди.

Ҳужжат Қонун ҳужжатлари маълумотлари миллий базасида эълон қилинган ва 24.07.2025 йилдан кучга киради.