Сенатнинг 11-ялпи мажлисида сунъий интеллектни қўллаш орқали юзага келадиган муносабатларни тартибга солувчи қонун муҳокама қилинди. Бу ҳақда юқори палата матбуот хизмати хабар берди.

Мазкур қонун билан «Ахборотлаштириш тўғрисида»ги қонун га сунъий интеллектни қўллаш орқали юзага келадиган муносабатларни тартибга солувчи ўзгартиришлар киритилмоқда.

Хусусан, «сунъий интеллект» тушунчасига ҳуқуқий таъриф берилмоқда. Ушбу соҳадаги давлат сиёсатининг асосий йўналишлари ҳамда махсус ваколатли органнинг вазифалари белгиланмоқда.

Шунингдек, ахборот ресурсларини яратишда ҳамда ахборот тизимлари ишида сунъий интеллектдан фойдаланишнинг умумий қоидалари қайд этилмоқда. Ушбу технологиялардан фойдаланишда шахсга доир маълумотлар дахлсизлигини таъминлашга қаратилган қоидалар ҳам белгиланади.

Ялпи мажлисда Қашқадарё вилоятидан сайланган сенатор Комила Карамова сунъий интеллектдан «тинимсиз ва манқуртларча фойдаланиш» онгни заифлаштираётганини таъкидлади.

Унинг қайд этишичиа, мазкур технологиянинг афзал жиҳати билан бирга, салбий жиҳати ҳам кўзга ташланмоқда. У буни ёшларнинг таълим жараёнларида курс иши, назорат ишини сунъий интеллект орқали ишлашини мисол қилди. «[Сунъий интеллект] ҳамма саволларга ҳам тўғри жавоб беряпти деб айтолмаймиз», — деди сенатор интеллектнинг ёлғон маълумот бериш фоизлари ошиб бораётганини қайд этиб.

«Ўқувчилар масалалар ечимида ўйламай, чат-ботнинг жавобини, яъни кўп ҳолларда нотўғри жавобини олишяпти. Натижа нима бўляпти? Оқибатда сунъий интеллектдан тинимсиз ва манқуртларча фойдаланиш онгни заифлаштирмоқда», — деди Комила Карамова.

Қонун сенаторлар томонидан маъқулланди.