АЭС қурилишида нега айнан Россия билан ҳамкорлик қилиняпти?
Шерзод Хўжаев Kommers.uz билан интервьюда АЭС қурилишидаги ҳамкорлик масаласида фикр билдирди.
Энергетика вазири ўринбосари Шерзод Хўжаев Kommers.uz билан интервьюда АЭС қурилишидаги ҳамкорлик масаласида фикр билдириб, нега айнан Россия варианти танланганига изоҳ берди.
«Тан олишимиз керак, ‘Росатом’ корпорацияси томонидан таклиф этилаётган реакторлар ташқи таъсирга нисбатан энг кучли ҳимояланган реакторлар ҳисобланади. Ташқи таъсир бу ерда ер қимирлаши, Америкадаги каби самолёт билан ҳужум қилиниши мумкин, снаряд келиб тушиши мумкин, бомба, ракета ва ҳоказо.
Бизда бу масалалар энди кўриб чиқилиши бошланганда нима бўлди? Жамоатчиликда Фукусима ёки Чернобылдаги каби воыеалар содир бўлса ёки станция портлаб кетса нима бўлади деган ҳавотир уйғонди. Мана шу нуқтаи-назардан Россия таклиф этаётган реакторлар энг хавфсиз», — деди вазир ўринбосари.
Суҳбатни тўлиқ қуйида томоша қилишингиз мумкин:
Аввалроқ Шерзод Хўжаев АЭС қурилиши сиёсий ёки иқтисодий лойиҳа экани ҳақидаги саволга жавоб бергани хабар қилинганди.
Вазир ўринбосарининг таъкидлашича, бу лойиҳа сиёсий ёки иқтисодий эканига АЭСни қурдираётган мамлакат эмас, уни қураётган мамлакат баҳо беради.
«Бу мен учун кўпроқ сиёсий, яъни менинг компаниям узоқ ёки қўшни мамлакатда бўлиши мен учун сиёсий жиҳатдан муҳим. Мен бирорта мамлакатни эшитмаганман: бошқа мамлакатга бориб, атом станциясини қурса, қандайдир сиёсий мақсадларни кўзламаса. Бу фақат Россия ёки Америка ё Хитой, Корея, Франция эмас, ҳамма жойда бир хил», — деган Шерзод Хўжаев.