Apple iPhone 13’га кўпроқ эътибор қаратиш учун iPad ишлаб чиқаришни кескин қисқартирди. Бу ҳақда Nikkei Asia ўз манбаларига асосланиб ёзмоқда.

Хабарга кўра, сўнгги 2 ой ичида iPad ишлаб чиқариш Apple компаниясининг дастлабки режаларидан 50 фоизга камайган. iPhone 13 ишлаб чиқарилишига iPad компонентларидан ташқари эски iPhone моделлари учун мўлжалланган элементлар ҳам йўналтирилмоқда. Apple iPad ва iPhone учун бир хил компонентлардан фойдаланади, бу эса компанияга керак бўлган пайт қурилмалар ўртасида таъминотни алмаштириш имконини беради.

«Ишлаб чиқаришдаги қийинчиликлар сўнгги чоракда компанияга 6 миллиард долларга тушди ва Рождество олдидан энг гавжум мавсум натижаларига таъсир қилади», — дейди компания раҳбари.

Хабарга кўра, Apple iPhone 13 ишлаб чиқаришга устувор аҳамият беради. Чунки компания смартфонларга планшетларга қараганда юқори талабни тахмин қилмоқда. Қайд этилишича, iPhone сотувга чиқарилганидан кейинги дастлабки ойларда энг юқори чўққисига чиқади, шунинг учун смартфонларнинг узлуксиз ишлаб чиқарилишини таъминлаш ҳозирда Apple компаниясининг устувор йўналиши ҳисобланади.

Аввалроқ Apple Watch ва iPhone’га бахтсиз ҳодиса вақти автоматик қўнғироқ қилиш функцияси қўшилиши мумкинлиги ҳақида хабар берилганди.