2025 йилнинг январь март ойларида Ўзбекистоннинг ташқи қарзи 4 млрд доллардан ошди. Бу ҳақда Марказий банкнинг мамлакат тўлов баланси, халқаро инвестициявий мавқеи ва ташқи қарзига бағишланган шарҳида келтирилган.

Марказий банк глобал савдо сиёсатининг кескинлашуви ва фрагментация жараёнларининг кучайиши билан боғлиқ иқтисодий хатарлар ва ноаниқликларнинг ортиши фонида Ўзбекистоннинг анъанавий экспорт маҳсулотлари жаҳон нархларининг юқори даражада сақланиб қолишини таъкидлади. Шунингдек, ташқи меҳнат миграцияси ва туризм соҳаларида ижобий тенденциялар кузатилди.

Ҳисобот чораги якунларига кўра, жорий операциялар ҳисоби 160,7 млн доллар (2024 йилнинг биринчи чорагида — 2,1 млрд доллар) миқдорида манфий сальдо билан шаклланди. Савдо баланси тақчиллиги ўтган йилнинг мос даврига нисбатан 34 фоизга қисқариб, 2,6 млрд долларни ташкил этди. Бу импорт ҳажми деярли ўзгармаган ҳолда экспортнинг сезиларли ўсиши билан изоҳланди.

Хусусан, жами экспорт ҳажми 22 фоизга ошиб, қарийб 8 млрд долларга етди, жами импорт ҳажми эса 10,5 млрд долларни ташкил этди. Шунингдек, мамлакатга халқаро пул ўтказмалари ҳажмининг ўсиши бирламчи ва иккиламчи даромадлар баланси ижобий сальдо (мос равишда 148,9 млн доллар ва 2,2 млрд доллар) билан шаклланишига сабаб бўлди.

Жорий операциялар ҳисоби тақчиллиги тўғридан-тўғри, портфель ва бошқа инвестициялар жалб қилиниши ҳисобига молиялаштирилди.

Биринчи чоракда мамлакатга тўғридан-тўғри хорижий инвестицияларнинг соф киритилиши қарийб икки баравар ўсиб, 752,3 млн долларни ташкил этди.

Портфель инвестицияларнинг соф жалб қилиниши асосан халқаро облигациялар ҳисобига 1,5 млрд долларга етди. Натижада молиявий ҳисоб манфий сальдоси 791,1 млн долларни ташкил этди.

Шунингдек, халқаро захира активларининг хорижий валютадаги қисми 1,8 млрд долларга кўпайди. Жаҳон бозорида олтин нархининг юқори суръатда ўсиши натижасида халқаро захиралар қолдиғи йил бошига нисбатан қарийб 6,7 млрд долларга ошиб, 2025 йилнинг 1 апрель ҳолатига 47,9 млрд долларни ташкил этди.

Марказий банк тўлов балансида акс этган амалиётлар ва нооперациявеий ўзгаришлар таъсирида Ўзбекистоннинг соф халқаро инвестициявий мавқеи жорий йил бошига нисбатан 24 фоизга мустаҳкамланиб, апрель ойига келиб 17,2 млрд долларга етганини қайд этди. Шу билан бирга, резидентларнинг чет эл валютасидаги активлари ҳажми йил бошига нисбатан 7,9 млрд долларга (8 фоиз), ташқи мажбуриятлари ҳажми эса 4,6 млрд долларга (5 фоиз) ошди.

Биринчи чорак якунларига кўра, умумий ташқи қарз ҳажми 68,4 млрд долларни (чорак давомида 4,3 млрд долларга ўсиш) ташкил этди, шундан давлат ташқи қарзи 35,8 млрд долларни (+1,9 млрд доллар), корпоратив ташқи қарз 32,6 млрд долларни (+2,4 млрд доллар) ташкил этди.