Apple Rutube’дан iOS иловасида Россия давлат ОАВларининг контентини яширишни талаб қилди
Apple Rutube’нинг iOS иловасидан Россия давлат ОАВларининг медиа-контентларини олиб ташлаш ёки уни фақат россиялик фойдаланувчиларга тақдим этишни талаб қилмоқда. Агар видеохостинг чора кўрмаса, илова AppStore’дан ўчириб ташланади.
Apple компанияси Rutube видеохостингидан iOS иловасида Россия давлат оммавий ахборот воситаларининг контентини яширишни ёки уни фақат россиялик фойдаланувчиларга тақдим этишни талаб қилди. Бу ҳақда Rutube матбуот хизматига таяниб, ТАСС хабар бермоқда.
Қайд этилишча, видеохостинг аллақачон бир қатор мамлакатлардан иловага киришни чеклаб қўйган.
«Apple Rutube иловасини модерация қилиш муаммосини икки йўл билан ҳал қилишни таклиф қилмоқда: давлат томонидан ҳомийлик қилинадиган медиа-контентни олиб ташлаш ёки уни фақат россиялик фойдаланувчиларга тақдим этиш», дейилади Rutube хабарида.
Rutube’да қарор қабул қилиш учун икки ҳафта муддат бор. Агар видеохостинг чора кўрмаса, илова AppStore’дан ўчириб ташланади.
Rutube аллақачон Россия, Қозоғистон ва Беларусдан бошқа мамлакатлар фойдаланувчилари учун хизматга кириш чеклаб қўйилганини маълум қилди.
Компания матбуот хизмати Rutube’дан асосан Россия оммавий ахборот воситалари ва YouTube’да каналлари блокланган блогерлар фойдаланаётганини эслатди.
Rutube ҳақида
Rutube 2006 йилда Олег Волобуев ва Михаил Паулкин томонидан ишга туширилган. 2008 йилда «Газпром-Медиа» ҳолдинги компаниянинг назорат пакетини сотиб олди.
У 15 миллион долларга баҳоланган эди. Лойиҳа яратувчилари ҳали ҳам мотивацион улушларга эга.
2020 йилда «Газпром-Медиа» 100 фоиз активларни сотиб олди. Компания «Газпром-Медиа» холдингига кирувчи «Интерфакс-ТВ» МЧЖга бириктирилган эди.
YouTube видеохостинги 10 март куни россиялик фойдаланувчилар учун монетизацияни бутунлай тўхтатганидан сўнг Rutube комиссиядан бош тортди ва блогерларга реклама учун тўловни тўлиқ амалга ошира бошлади.