Бош прокуратура: «2022 йилда мансабдор шахслар давлат ва жамият манфаатларига 1,012 трлн сўм зарар етказган»
Ўзбекистонда 2022 йил давомида жами 2965 та жиноят иши бўйича 3116 нафар мансабдор шахс жиноий жавобгарликка тортилган. Улар жиноятлари оқибатида давлат ва жамият манфаатларига 1,012 трлн сўм миқдорида моддий зарар етказган бўлиб, ушбу зарарнинг 847 млрд сўми ундирилган
Ўзбекистонда 2022 йил давомида жами 2965 та жиноят иши бўйича 3116 нафар мансабдор шахс жиноий жавобгарликка тортилган. Бу ҳақда Бош прокуратура матбуот хизмати хабар берди.
Маълум қилинишича, жинояти фош қилинган мансабдор шахсларнинг 110 нафари республика, 264 нафари вилоят ва 2742 нафари туман (шаҳар) миқёсидаги вазирлик, идора ва ташкилотларда фаолият юритган.
Шунингждек, жиноий жавобгарликка тортилган мансабдор шахсларнинг 2103 нафари ўзганинг мулкини ўзлаштириш ва растрата йўли билан талон-торож қилиш, 265 нафари мансаб мавқеини суиистеъмол қилиш, 243 нафари фирибгарлик, 169 нафари порахўрлик, 51 нафари мансаб сохтакорлиги, 22 нафари мансабга совуққонлик билан қараш, 14 нафари мансаб ваколати доирасидан четга чиқиш ва 249 нафари бошқа жиноятларни содир этган.
Мансабдор шахсларнинг жиноятлари оқибатида давлат ва жамият манфаатларига 1 триллион 12 миллиард сўм миқдорида моддий зарар етказилган бўлиб, тергов жараёнида ушбу зарарнинг 847 миллиард сўми ундирилган.
Аввалроқ жиноят ишлари бўйича Тошкент шаҳар судлари томонидан 2022 йил давомида 12 141 нафар шахсга нисбатан 9807 та жиноят иши кўриб тамомлангани ҳақида хабар берилганди. Хусусан, соҳалар бўйича коррупцияга оид кўриб тамомланган ишлар бўйича банк йўналишида 7 нафар шахс жиноий жавобгарликка тортилган.
