«Электр тармоқларида юзага келган носозликларнинг 90 фоизи бартараф этилди» — Энергетика вазирлиги
Ўзбекистонда совуқ об-ҳаво сабаб электр тармоқларида юзага келган носозликларнинг 90 фоизи бартараф этилди. Энергетика вазирлиги масъул ходимининг маълум қилишича, 24 январь куни электр станциялар орқали 228 млн 600 минг кВт-соат электр энергияси ишлаб чиқарилди
Ўзбекистонда совуқ об-ҳаво сабаб электр тармоқларида юзага келган носозликларнинг 90 фоизи бартараф этилди. Бу ҳақда АОКАда ўтказилган брифингда Энергетика вазирлиги масъул ходими Обиджон Дилмуродов маълумот берди.
Қайд этилишича, 24 январь куни электр станциялар орқали 228 миллион 600 минг кВт-соат электр энергияси ишлаб чиқарилди, шундан истеъмолчиларга 229 миллион 200 минг кВт-соат электр энергияси етказиб берилди.
Шунингдек, газ таъминоти корхоналари томонидан 148 миллион куб метр табиий газ ва 2000 тонна суюлтирилган газ етказиб берилди. Ҳозирда ҳудудларда 3600 тонна суюлтирилган газ ҳамда 23 500 дона газ баллони заҳираси мавжуд. Истеъмолчиларни кўмир маҳсулотлари билан таъминлаш мақсадида 3000 тонна маҳаллий кўмир ҳудудлардаги омборларга ортиб юборилди.
Бундан ташқари, газ тармоқларида табиий газ босими кўтарилиши натижасида бир кунда 65 та маҳалладаги 22 716 та хонадоннинг табиий газ таъминоти яхшиланди.
Аввалроқ Энергетика вазирлиги ва «Газпром» ўртасида имзоланган «йўл харитаси» бўйича маълумот берилганди. Шунингдек, Ўзбекистонда 100 дан ортиқ АЁҚШга бензин етказиб бериш тўхтатилгани ҳақида хабар берилди.
Мавзуга доир: Ўзбекистон Туркманистондан нефть сотиб олади