Россиялик аралаш яккакураш курашчиси Хабиб Нурмагомедов билан ҳамкорликда «М-ит групп франчайзинг» компанияси M-eat by Khabib фаст-фуд ресторанлар тармоғини яратишни режалаштирмоқда. Бу ҳақда унинг вакили «Ведомости»га маълум қилди.

Хабарга кўра, тармоқнинг биринчи корхонаси аллақачон «Москва-сити» бизнес марказидаги «Пойтахтлар шаҳри»да очилган. Май ойининг охирига қадар компания Москвада яна 14 та шохобчани ишга туширишни режалаштирмоқда. Унинг вакили аниқ манзилларни айтмаган, лекин битта муассаса очилишига сармоя киритиш 2–3 миллион рубльни ташкил этишига аниқлик киритган.

Таъкидланишича, ушбу лойиҳанинг умумий қиймати, Москва шаҳрида аллақачон очилган ресторанни ҳисобга олмаганда, биринчи босқичда 28–42 миллион рубльни (360–550 минг доллар) ташкил қилади.

Шунингдек, «М-ит групп франчайзинг» ресторан тармоғини ривожлантириш бўйича катта режаларга эга. У 2023 йил охиригача бешта давлатда, жумладан Қозоғистон, Ўзбекистон, Қирғизистон, Туркия ва Бирлашган Араб Амирликларида 150 та савдо нуқталарини очишни кутмоқда. Компания ушбу мамлакатларда франчайзларни қидирмоқда.

Бундан ташқари, Россияда компания Марказий федерал округнинг бошқа минтақаларига, шунингдек, Шимолий Кавказга кенгайишни кўриб чиқмоқда. M-eat by Khabib, шунингдек, кейинчалик ўз маҳсулотларини йирик чакана савдо дўконларида сотишни режалаштирмоқда.

Аввалроқ ресторанлар 1 июлгача фоизсиз бўлиб тўлаши мумкин бўлган солиқлар ҳақида хабар берилганди.