Levi’s Россия бозорини тарк этади
Levi Strauss & Co тармоғи 29 йилдан кейин Россия бозорини тарк этади. Компания мамлакатга товар етказиб беришни тўхтатди, чакана бизнес учун харидорлар қидирилмоқда.
Жинси кийимлар сотувчи Levi Strauss & Co тармоғи 29 йиллик фаолиятидан кейин Россия бозорини тарк этишга қарор қилди. Бу ҳақда «Коммерсантъ»нинг мода бозоридаги бир нечта манбалари хабар берди.
Маълум қилинишича, компания товарларни етказиб беришни тўхтатган ва чакана бизнес учун харидорлар қидирмоқда. Товарларни етказиб бериш тўхтатилди, уларнинг қолган қисмини бошқа бозорлар орқали сотиш режалаштирилмоқда.
Экспертларнинг фикрича, АҚШ компаниясининг франшайзинг шериклари Levi’s’нинг мамлакатга параллел импортини йўлга қўйиши мумкин.
Манбалардан бири Туркиянинг Fiba Holding компаниясини Levi’s дўконларининг Россиядаги потенциал харидорларидан бири сифатида кўрмоқда (Россияда Gap, Marks & Spencer ва Banana Republic савдо нуқталарини ишлаб чиқади).
Айрим суҳбатдошлар эса Levi’s билан музокаралар олиб борилаётганини даъво қилмоқда, аммо принципиал келишувга ҳали эришилмаган.
Levi’s бош офиси «Коммерсантъ» сўровига жавоб бермаган. Fiba Holding билан боғланишнинг имкони бўлмагани маълум қилинди.
Уруш таъсири
Март ойида Levi’s бош офиси Украинага ҳужум туфайли Россиядаги тижорат фаолияти ва инвестиция киритиш тўхтатилганини эълон қилди.
Кейинчалик Levi Strauss & Co ижрочи директори Чип Берг Financial Times нашрига компаниянинг 2022 йилда Россияда дўконларини қайта очиш режаси йўқлигини айтди.
«Коммерсант»нинг иккита йирик онлайн-платформадаги манбалари компания янги мавсум учун маҳсулотларни режага мувофиқ жўнатганини ва бошқа етказиб бериш кутилмаслигини маълум қилди.