2026 йил I чорагида Ўзбекистонда ўртача ойлик номинал ҳисобланган иш ҳақи 6,82 миллион сўмни ташкил этди. Статистика қўмитаси таҳлилига кўра, бу кўрсаткич 2025 йил мос даврига нисбатан 1 миллион сўмга ёки 17,4 фоизга ўсган.

Ҳудудлар бўйича энг кўп ўртача ойлик Тошкент шаҳрида тўланган — 11,7 миллион сўм. Мазкур миқдор ўтган йил мос даврига нисбатан 18,8 фоизга ўсган. Кейинги ўринни Навоий вилояти эгаллаган — 8,45 миллион сўм. Йиллик ўсиш — 15,7 фоизга етган.

Қолган ҳудудларда ойлик иш ҳақи республикадаги ўртача миқдордан (6,82 миллион сўм) кам шаклланган.

Ҳудудлар кесимида энг паст маош Қашқадарё вилоятида тўланган — 4,66 миллион сўм.

Мамлакатда энг кўп ўртача ойлик банк, суғурта, лизинг, кредит ва воситачилик соҳаларида тўланган — 18,6 миллион сўм. Бу миқдор ўтган йил мос даврига нисбатан 18,2 фоизга ошган.

Кейинги юқори маошлар ахборот ва алоқа соҳасида бўлиб, ўртача 16,52 миллион сўмни ташкил этган. Бу бир йил аввалгидан 11 фоизга кўтарилган.

Ташиш ва сақлаш (10,7 миллион сўм), саноат (8 миллион сўм) ҳамда савдо (7,21 миллион сўм) соҳаларида ҳам ойлик иш ҳақлари республикадаги ўртача кўрсаткичдан баланд бўлган.

Уч ой давомида Ўзбекистонда энг кам ойлик иш ҳақи қишлоқ, ўрмон ва балиқ хўжалиги соҳасида тўланган — 3,5 миллион сўм. Шу билан бирга, соғлиқни сақлаш ва ижтимоий хизматлар ходимлари 4,11 миллион сўм (ўсиш 13 фоиз), таълим вакиллари 4,61 миллион сўм ойлик олган (ўсиш 14,2 фоиз).

Маълумот учун, 2025 йил январь—декабрь ойларида Ўзбекистонда ўртача ойлик номинал ҳисобланган иш ҳақи 6,4 миллион сўмга етганди. Бу 2024 йилдагига нисбатан 18,9 фоизга ошган. Аввалроқ Марказий банк мамлакат аҳолиси учун ойлик иш ҳақи асосий даромад манбайи бўлиб қолаётганини билдирган.