Энергетика вазири ўринбосари Шерзод Хўжаев Kommers.uz’га берган интервьюсида мамлакатда атом электр станцияси қурилиши сиёсий ёки иқтисодий лойиҳа экани ҳақидаги саволга жавоб берди.

Вазир ўринбосарининг таъкидлашича, бу лойиҳа сиёсий ёки иқтисодий эканига АЭСни қурдираётган мамлакат эмас, уни қураётган мамлакат баҳо беради.

«Бу мен учун кўпроқ сиёсий, яъни менинг компаниям узоқ ёки қўшни мамлакатда бўлиши мен учун сиёсий жиҳатдан муҳим. Мен бирорта мамлакатни эшитмаганман: бошқа мамлакатга бориб, атом станциясини қурса, қандайдир сиёсий мақсадларни кўзламаса. Бу фақат Россия ёки Америка ё Хитой, Корея, Франция эмас, ҳамма жойда бир хил», — деган Шерзод Хўжаев.

Суҳбатни тўлиқ қуйида томоша қилиш мумкин:

Аввалроқ Ўзбекистоннинг ўша вақтдаги ташқи ишлар вазири Абдулазиз Комилов Тошкент мамлакатдаги биринчи атом электр станциясини қуриш лойиҳасида фақат иқтисодий моҳиятга таянишини ва бу ерда бошқа сиёсий қарашларнинг бўлиши мумкин эмаслигини таъкидлаганди.

«Шуни тасдиқлаймизки, Ўзбекистонда атом электр станцияси қурилиши сиёсатдан холи жараён, у соф иқтисодий хусусиятга эга», — деганди ўшанда Абдулазиз Комилов.