«Ўзбекистон республика товар-хом ашё биржаси»нинг барча савдо платформаларида 27 декабрь–2 январь кунлари 1 триллион 858,7 миллиард сўмлик товарлар сотилди. Бу ҳақда биржа матбуот хизмати хабар берди.

Маълум қилинишича, сотилган товарлар ҳажми аввалги ҳафтага нисбатан 19,3 фоизга камдир. Бунда сотувларнинг 88,4 фоизи — биржа савдолари; 0,2 фоизи — кўргазма-ярмарка савдолари; 11,0 фоизи — электрон давлат харидлари ва 0,3 фоизи — авторақамларнинг онлайн-аукционига тўғри келган.

Шунингдек, кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 700,9 миллиард сўмни ташкил қилган. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 15,5 миллиард сўмлик маблағлари тежалган.

Таъкидланишича, очиқ биржа савдолари орқали жами 1 триллион 644,1 миллиард сўмлик товар ресурслари сотилган. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган.

Кўриб чиқилаётган даврда биржа савдоларида 2434,0 тонна пахта ёғи сотилган. Ўтказилган савдоларда ҳар куни ўртача 66 харидор иштирок этиб, ўртача кунлик сотув ҳажмлари 609,0 тоннани ташкил қилган. Шунингдек, барча навли пахта ёғининг кунлик ўртача нархлари маҳсулотнинг бир тоннаси учун 15 миллион 519,0 минг сўмдан 14 миллион 364,7 минг сўмгача, яъни 7,4 фоизга пасайган.

Шунингдек, биржанинг суюлтирилган газ бозорида нархлар пасайиши қайд этилган. Ҳафта давомида биржа савдоларига 10 минг 399,0 тонна суюлтирилган газ қўйилган ва улардан 7487,0 тоннаси, яъни 72,0 фоиз қисми сотилган. Ўтказилган савдоларда ҳар куни ўртача 144 харидор иштирок этган.

Шу билан бирга, кўриб чиқилаётган даврда суюлтирилган газ бўйича шаклланган кунлик ўртача нархлар маҳсулотнинг бир тоннаси учун 2 миллион 536,7 минг сўмдан 2 миллион 422,7 минг сўмгача, яъни 4,5 фоизга пасайган. Ўтказилган биржа савдолари натижасида суюлтирилган газ бўйича шаклланган ўртача ҳафталик нархи маҳсулотни бир тоннаси учун 2 миллион 491,1 минг сўмни ташкил этган.

Бундан ташқари, биржа савдоларида 7219,0 тонна пахта толаси сотилган. Ўртача кунлик сотув ҳажмлари 1805,0 тоннани ташкил қилган. Кўриб чиқилаётган даврда барча навли пахта толасининг кунлик ўртача нархлари маҳсулотнинг бир тоннаси учун 29 миллион 893,0 минг сўмдан 27 миллион 410,6 минг сўмгача, яъни 8,3 фоизга пасайган.

Аввалроқ Шўртан газ-кимё комплекси қувватини 3 бараварга ошириш учун яна бир мажмуа қурилиши хабар қилинганди. Шунингдек, Европада газ нархи 2 ойдаги энг юқори даражага кўтарилгани ҳақида хабар берилди.