Ўзбекистонда товарларни олиб кириш ва олиб чиқиш учун бож ва солиқларни тўлаш ёки депозитга қўйишдан озод этиш ҳуқуқини берувчи Божхона конвенциясини қўллаш ҳақидаги низом тасдиқланди. Бу ҳақда Адлия вазирлигининг Huquqiy axborot канали хабар берди.

Маълум қилинишича, ҳукумат қарори билан 1975 йилдаги Юкларни халқаро йўлларда ташиш дафтарчасини қўллаган ҳолда юкларни халқаро ташиш тўғрисидаги Божхона конвенциясини қўллаш ҳақидаги низом тасдиқланган. Низомга кўра, халқаро йўлларда ташиш (ХЙТ) тартиб-таомиллари асосида ташиладиган товарлар оралиқ божхона органларида олиб кириш ёки олиб чиқиш учун бож ва солиқларни тўлаш ёки депозитга қўйишдан озод этилади.

Таъкидланишича, бундай божхона органларида ХЙТ дафтарчасини божхона расмийлаштирувидан ўтказганлик учун йиғим ундирилмайди. Шунингдек, ХЙТ тартиб-таомилларига асосан муҳрланган транспорт воситаларида, муҳрланган транспорт воситаларининг таркибида ёки контейнерларда ташилган товарлар оралиқ божхона органларида божхона кўригидан озод қилинади.

Қайд этилишича, ХЙТ тартиб-таомиллари бир қатор ҳолатларда қўлланилади. Жумладан, товарлар:

• ХЙТ дафтарчаси билан кузатиб борилса;
• кафолат уюшмаси кафолати билан таъминланса;
• божхона пломбалари ва муҳрлари остида ташишга рухсат берилган транспорт воситаларида, транспорт воситаларининг таркибида ёки контейнерларда ташилганда.

Шу билан бирга, транспорт воситаларига «TIR» ёзувли лавҳа ёпиштирилиши лозим. Ҳар бир ХЙТ дафтарчаси учун 100 минг еврогача божхона тўловлари ва солиқларни тўлаш кафолатланади.

Маълумот ўрнида, ХЙТ дафтарчасидан фойдаланиш учун рухсатнома Давлат божхона қўмитасининг Қорақалпоғистон, вилоятлар, Тошкент шаҳар бошқармалари ва «Тошкент-АЭРО» божхона комплекси томонидан берилади. Ушбу қарор расмий эълон қилинган кундан эътиборан 3 ой ўтгач кучга киради.

Аввалроқ Ўзбекистонда товарларни божхона қийматини шартли белгилаш орқали чиқариб юбориш тартиби белгилангани хабар қилинганди. Шунингдек, Туркий кенгашга аъзо давлатлар божхона тартибини стандартлаштиришга келишиб олгани ҳақида хабар берилди.