Илон Маск Twitter саҳифасида Tesla ўз бренди туширилган маҳсулот ишлаб чиқаришини ва улар Dogecoin’га сотилишини маълум қилди.

Қайд этиш керакки, миллиардернинг твитидан сўнг, альткоин нархи 25 фоиздан кўпроққа кўтарилди ва қиймати 0,20 доллардан ошди.

Илон Маск 13 декабрь куни Time журналига берган интервьюсида Dogecoin биткоинга қараганда тўловлар учун қулайроқ криптовалюта эканини таъкидлаган.

Унинг сўзларига кўра, Dogecoin тармоғидаги транзакциялар — биткоин билан бўлган операцияларга қараганда тезроқ ва арзонроқ.

Маскнинг сўзларига кўра, биткоин сармоявий активга айланди, шунинг учун криптоинвесторлар тангани сотиш ёки ундан транзакцияларни амалга ошириш учун фойдаланишдан кўра, жамғаришни афзал кўради.

Октябрь ойида Маск нима учун Dogecoin’ни қўллаб-қувватлаётганини тушунтирганди. Тадбиркорнинг айтишича, у альткоинни «халқ криптовалютаси» деб билади. У «мем» криптовалютасини қўллаб-қувватлашдан олдин Tesla ва SpaceX ходимлари билан гаплашган ва уларнинг кўпчилиги Dogecoin эгалари бўлиб чиққан.

Аввалроқ Илон Маск Time журнали талқинига кўра, «Йил одами», деб топилгани хабар қилинганди.