Туркия Ғарбнинг Россияга киритган санкциялари четлаб ўтилмаслигини маълум қилди
АҚШ Россиянинг жисмоний ва юридик шахслари санкциялардан қочиш учун Туркиядан фойдаланишга уринаётганидан хавотир билдирди. Туркия молия вазири ўринбосари Юнус Элиташ мамлакатнинг санкциялар масаласидаги позицияси ўзгармаганини таъкидлади.
Туркия Молия ва ғазначилик вазирлиги Россиядан келган бирорта жисмоний ёки юридик шахснинг Ғарб санкцияларини четлаб ўтишига йўл қўйилмаслигини маълум қилди. Бу ҳақда Bloomberg АҚШ Молия вазирлиги ва Туркия вакиллари ўртасидаги телефон суҳбатидан сўнг хабар берди.
Музокаралар чоғида АҚШ молия вазири ўринбосари Уолли Адейемо Россиянинг жисмоний ва юридик шахслари АҚШ ҳамда бошқа 30 давлат томонидан киритилган санкциялардан қочиш учун Туркиядан фойдаланишга уринаётганидан хавотир билдирди.
Бунга жавобан Туркия молия вазири ўринбосари Юнус Элиташ америкалик ҳамкасбига мамлакатнинг санкциялар масаласидаги позицияси ўзгармаганини маълум қилган.
Bloomberg агентлигининг ёзишича, Туркия Россия босқинига Киевга ҳарбий ёрдам сифатида учувчисиз самолётлар етказиб бериш орқали қаршилик қилмоқда.
Ғарб хавотири
Август ойи бошида Financial Times нашри номи ошкор этилмаган олти нафар расмийга таяниб, Ғарбда Туркия ва Россия ўртасидаги иқтисодий ҳамкорлик чуқурлашаётганидан норозилик кучайиб бораётгани ҳақида хабар берган эди.
Унга кўра, Ғарб расмийлари Россия ва Туркия раҳбарларининг савдо ҳамда энергетика соҳасидаги ҳамкорликни кенгайтириш режаларидан хавотирда ва Анқара Москвага чекловларни четлаб ўтишга ёрдам берса, жавоб қайтаришга тайёр.
Бу ҳақда FT Туркия президенти Ражаб Тоййиб Эрдўғон ва Россия президенти Владимир Путин ўртасида бўлиб ўтган учрашувдан сўнг ёзган. Учрашувда савдони кучайтириш, рус гази учун рублда тўлаш ва Туркияда Мир карталаридан фойдаланиш муҳокама қилинганди.
Учрашув якунлари бўйича давлат раҳбарлари қўшма баёнот қабул қилган, унда, хусусан, Туркия Россия гази учун рублда тўлашни бошлашига келишиб олинганди.
АҚШ ҳукуматидаги аноним манбанинг Politico нашрига айтишича, Оқ уй америкалик компанияларга Анқара ва Москва «расмий иқтисодий ҳамкорлик»га киришса, Туркия билан иқтисодий алоқаларни узишни тавсия қилиши мумкин.