Алюминий нархи Россиянинг Украинадаги ҳарбий амалиёти бошланганидан кейин тарихий энг юқори даражага кўтарилди. Бу ҳақда Forbes хабар берди.

Маълум қилинишича, 24 февралда алюминийнинг биржа нархлари тарихий максимал даражага кўтарилиб, 2008 йил июль ойидаги рекордни янгилаган. Лондон металл биржасида сотилган уч ойлик металл фючерслари кунлик энг юқори кўрсаткичда бир тоннаси учун 3491 долларни ташкил этган, бу бир кун олдинги савдолар ёпилишига нисбатан 6 фоизга кўпдир.

Шунингдек, 24 февраль куни никель фючерслари 5 фоизга ошиб, 25 минг 650 долларга кўтарилди. Қайд этилишича, металлар Россия президенти Владимир Путин томонидан Украина ҳудудида эълон қилинган ҳарбий операция фонида қимматлашмоқда.

«Алюминий билан бўлгани каби, никель нархи ҳам эҳтимолий санкциялар ва жавоб чоралари қўлланса, Россиядан никель етказиб берилиши чекланиши мумкинлигидан қўрқиш туфайли кўтарилмоқда», — дейди Commerzbank таҳлилчиси Даниел Бриземан.

Маълумотларга кўра, Россия жаҳон алюминий ишлаб чиқаришининг қарийб 6 фоизини ва қазиб олинган никель таъминотининг 7 фоизини ташкил қилади.

Бундан ташқари, 24 февраль куни эрталаб Путин Донбассда махсус операция бошланганини эълон қилиб, Москва Украинани «қуролсизлантириш ва нацистлардан тозалаш»га интилишини таъкидлади. Украина Президенти Владимир Зеленский бутун мамлакат бўйлаб ҳарбий ҳолат эълон қилди ва Москва билан дипломатик алоқаларни узди.

Шу ҳафта бошида Европа Иттифоқи Донецк ва Луганск мустақиллигининг тан олинишини қўллаб-қувватлаган 351 нафар Давлат Думаси депутатига, шунингдек, Брюсселнинг сўзларига кўра, Украина суверенитетини бузишда иштирок этган 27 киши ва ташкилотга нисбатан санкциялар қўллашини эълон қилди.

Шунингдек, АҚШ Молия вазирлиги Россия давлат тараққиёт корпорацияси, «Промсвязьбанк», улар томонидан назорат қилинадиган ўнлаб ташкилотларга, шунингдек, Қўшма Штатлардаги мулклари музлатилиши мумкин бўлган «Путинга яқин элита ва уларнинг оилалари»га қарши блокловчи санкциялар киритди.

АҚШ Президенти Жо Байден, шунингдек, «Шимолий оқим-2» оператори Nord Stream 2 AG ва унинг мансабдор шахсларига қарши санкциялар қўллашни буюрди. АҚШ ва Европа Иттифоқининг бу санкциялари Путиннинг Донецк ва Луганск мустақиллигини тан олиш қарорига жавоб бўлди.

Аввалроқ Россиялик миллиардерлар Украинадаги ҳарбий амалиётлар туфайли қанча бойлик йўқотгани хабар қилинганди. Шунингдек, Путиннинг йирик бизнесменлар билан учрашувидан қандай мақсад кўзлангани ҳақида хабар берилди.