«Валюта айирбошлаш ва битим тузишни ортга суринг» — рубль қулаши фонида иқтисодчидан тавсиялар
Рублнинг ҳаддан зиёд ўзгарувчан курси шароитида янги битимлар тузиш ҳам тижорий самара бермаслиги мумкин.

Россия Донбассда фаол ҳарбий ҳаракатлар олиб бормоқда. Ҳарбий операциялар фонида мамлакат валютаси — рубль қуламоқда.
Иқтисодчи Отабек Бакиров рублнинг қулаши фонида бизнес вакиллари ва меҳнат мигрантларига айрим маслаҳатларини бериб ўтди.
Қайд этилишича, Россиянинг давлат банклари билан боғлиқ корреспондентлик ва ўзаро клирингда муаммолар кузатилиши мумкин
«Россияга экспорт ва Россиядан импорт билан шуғулланувчи тадбиркорларимиз шу кунларда банк транзакцияларидан ва ҳисоб-китоблардан тийилиб турганлари афзал», — дейди у.
Рублнинг ҳаддан зиёд ўзгарувчан курси шароитида янги битимлар тузиш ҳам тижорий самара бермаслиги мумкин.
«Россиядаги мигрант ватандошларимиз валюта айирбошлаш, ўтказмалардан фойдаланишни ҳам кейинга суриб турганлари маъқул», — дейди иқтисодчи.
Аввалроқ Россия Украина чегарасида ҳарбий операция бошлаганидан сўнг рубль кескин тушиб кетгани хабар қилинганди. Москва биржасининг 24 февраль куни соат 7:00да бошланган эрталабки сессияси давомида доллар курси ўтган куннинг ёпилишига нисбатан 6,55 фоизга ошиб, 84,07 рублни ташкил қилди. Бу 2016 йил январидан бери энг паст кўрсаткичдир. Евро курси 95,2 рублдан ошди.
Маълумот учун, Россия президенти Владимир Путин 24 февраль куни Донбассда махсус ҳарбий операция ўтказишга қарор қилганини маълум қилди.
Унинг таъкидлашича, Украинани босиб олиш Россиянинг режасига кирмайди. Россия Украина таҳдиди остида ўзини хавфсиз ҳис қила олмайди.
Аввалроқ рубль турк лирасини ортда қолдириб, дунёдаги энг беқарор валютага айлангани хабар қилинганди.
Қайд этиш керакки, айни вақтда Донбассда ҳарбий ҳаракатлар кетмоқда. Икки давлат муносабатларининг бу даражада совуқлашиши 2013 йилга бориб тақалади. Зиддиятга Россия билан бевосита умумий чегарага эга бўлган Украинанинг Ғарбга яқинлашиши ҳамда НАТО ва Европа Иттифоқи каби ташкилотлар аъзосига айланиш хавфи сабаб бўлган.
Фақат Россия томонидан тан олинган Донецк ва Луганск Халқ Республикалари Донбасс деб аталмиш регионда, Украина ва Россия ўртасида жойлашган. Улар аввал Украина таркибига кирувчи мамлакатнинг шарқида жойлашган Донецк ва Луганск вилоятлари ҳисобланган. Бироқ 2013 йилда Украинада бошланган сиёсий инқироздан сўнг, ушбу вилоятлар Россиянинг «кўмагида» мустақил республикага айланган.






