Xiaomi йилига 300 мингта электромобиль ишлаб чиқарадиган завод очади
Компания 10 йил ичида электромобиль ишлаб чиқаришга 10 миллиард доллар сармоя киритиши маълум қилинганди
Хитойнинг технологик гиганти Xiaomi Пекинда йилига 300 мингта электромобиль ишлаб чиқарувчи завод қуради. Бу ҳақда компания бош директори Лэй Цзюнь хабар берди.
Reuters’нинг ёзишича, Xiaomi Пекиннинг Иқтисодий ва технологик ривожланиш зонасида завод, автомобилсозлик бўлими бош қароргоҳи ҳамда савдо ва тадқиқот офисларини қуради.
Март ойида Xiaomi 10 йил ичида электромобиль ишлаб чиқаришга 10 миллиард доллар сармоя киритиши маълум қилинганди. Август ойи охирида компания ўзининг автомобиль бўлинмасини рўйхатдан ўтказди.
Xiaomi ички бозорда смартфонлар сотувининг ўсишини таъминлаш учун минглаб дўконлар очмоқда. Аммо охир-оқибат бу дўконлардан электромобиллар учун савдо канали сифатида фойдаланишни режалаштирмоқда.
Аввалроқ Apple руль ва педалларсиз, мустақил ҳаракатланадиган электромобиль ишлаб чиқаришни режалаштираётгани ҳақида хабар берилганди.
