Иқтисодий тараққиёт ва камбағалликни қисқартириш вазири Жамшид Қўчқоров ҳамда Молия вазири Тимур Ишметов 25 ноябрь куни Жаҳон банкининг Марказий Осиё бўйича минтақавий директори Татяна Проскурякова билан учрашув ўтказди. Бу ҳақда вазирлик матбуот хизмати хабар берди.

Маълум қилинишича, учрашув давомида Жаҳон банки вакиллари Банк томонидан Ўзбекистонда 2022–2026 йилларда амалга оширилиши мўлжалланган ҳамкорлик дастурини ишлаб чиқиш жараёни ва жорий ҳолати ҳақида маълумот берган.

Шунингдек, учрашувда Ўзбекистонда амалга оширилаётган ислоҳотлар, ўзаро ҳамкорликни янада кенгайтириш, хусусийлаштириш борасида ишлаб чиқилаётган стратегиялар ва концепциялар муҳокама қилинган. Хусусан, давлат корхоналарини хусусийлаштириш учун шакллантирилаётган дастурлар, макроиқтисодий барқарорликка эришиш, камбағалликни қисқартириш борасида амалга оширилаётган ишлар, яшил иқтисодиётга ўтиш истиқболлари масалалари кўриб чиқилган.

Қайд этилишича, томонлар рақамли иқтисодиётга ўтиш, қайта тикланадиган энергия манбаларидан фойдаланиш, яшил энэргетика, саноат тармоқларини ривожлантириш, янги техникаларни жалб қилиш, қишлоқ хўжалигини ривожлантириш борасида фикр алмашган. Учрашув сўнггида томонлар ўзаро алоқаларни кенгайтириш ҳамда юқорида қайд этилган масалалар юзасидан ҳамкорликни кучайтиришга келишиб олган.

Аввалроқ Жамшид Қўчқоров МДҲ Молия-банк кенгаши делегацияси билан учрашгани хабар қилинганди. Шунингдек, Марказий банк ва Жаҳон банки валюта сиёсатини либераллаштириш ишлари натижасини муҳокама қилгани ҳақида хабар берилди.