Ўзбекистонда кейинги 5 йил давомида 1386 километр магистрал сув тармоқлари капитал таъмирланади. Бу ҳақда 2022–2026 йилларга мўлжалланган тараққиёт стратегиясини 2022 йилда амалга ошириш бўйича «йўл харитаси» лойиҳасида сўз боради.

Лойиҳага кўра, сув йўқотиш даражаси юқори бўлган 11 та йирик шаҳарларга (Тошкент, Самарқанд, Бухоро, Наманган, Фарғона, Навоий, Жиззах, Қарши, Нукус, Урганч ва Чирчиқ шаҳарларида) сунъий йўлдош орқали йўл қопламаларини бузмасдан ҳамда йўл инфратузилмаларига зарар етказмасдан сув сирқиш нуқталарини аниқлаш ва ҳар йили исроф бўлаётган 41,4 миллион куб метр ичимлик сувини тежаш режа қилинган.

Қайд этилишича, республиканинг барча шаҳар ва туманларида жами 4629 километр магистрал сув тармоқлари таъмирталаб бўлиб, 5 йил давомида 1386 километр қисмини йўл қопламаларини бузмасдан ва йўл инфратузилмаларига зарар етказмасдан капитал таъмирланади.

Шунингдек, республиканинг барча шаҳар ва туманларида жами 1919 километр оқова сув тармоқлари таъмирталаб бўлиб, 5 йил давомида 960 километр қисмини йўл қопламаларини бузмасдан ва йўл инфратузилмаларига зарар етказмасдан капитал таъмирланади.

Бундан ташқари, республикада йилига 1,6 миллиард куб метр тоза ичимлик суви ишлаб чиқарилиб, сувни етказиб бериш жараёнида исроф қилинадиган 469,8 миллион куб метр (31,2 фоиз) сувни тежаш чораларини кўрилади. Бунда кўриладиган йиллик 272,5 миллиард сўмга тенг молиявий зарарни бартараф этилади.

Шунингдек, коммунал соҳага трансфер қилинган Исроил технологиясини Тошкент шаҳри, Самарқанд вилояти Ургут тумани ва Андижон шаҳрида орттирилган тажриба асосида 2022 йилдан республиканинг бошқа ҳудудларида ҳам қўллаш чоралари кўрилади.

Аввалроқ Британия компанияси Наманганда сув тозалаш иншооти куриши хабар қилинганди.