Буюк Британия ва Шимолий Ирландия бирлашган қироллигининг Metito Utilities Limited компанияси «Наманган шаҳар оқова сув тозалаш иншоотини давлат-хусусий шериклик шартлари асосида қуриш» лойиҳаси бўйича тендерда ғолиб бўлгани эълон қилинди. Бу ҳақда Давлат-хусусий шерикликни ривожлантириш агентлиги Kommers.uz’га хабар берди.

Мазкур лойиҳа Президентнинг 2018 йил 30 ноябрдаги «Ўзбекистон Республикасида ичимлик суви таъминоти ва канализация тизимларини ривожлантириш бўйича қўшимча чора-тадбирлар тўғрисида»ги қарорига мувофиқ Осиё тараққиёти банки кўмагида, Уй-жой коммунал хизмат кўрсатиш вазирлиги, «Ўзсувтаъминот» акциядорлик жамияти ҳамда Давлат-хусусий шерикликни ривожлантириш агентлиги томонидан амалга оширилиши белгиланган.

ДХШ агентлиги хабарига кўра, лойиҳа бўйича 2 босқичли очиқ ва шаффоф тендер жараёнлари ўтказилган. 1-босқичда лойиҳага қизиқиш билдирган 23 та хориж компанияга дастлабки малакани баҳолаш (RFQ) шартлари юборилган. 2-босқичда эса Буюк Британия ва Шимолий Ирландия бирлашган қироллигининг Metito Utilities Limited компанияси ҳамда Нидерландиянинг Almar Water Solutions BV консорциум компанияси иштирок этган.

Йиллик эркин фойдаланганлик учун тўлов бўйича Metito Utilities Limited компанияси 97,5 миллиард сўм, Almar Water Solutions BV консорциум компанияси эса 103,1 миллиард сўмлик таклиф билдирган.

Таъкидланишича, 20 декабрь куни мазкур лойиҳа бўйича идоралараро тендер комиссияси энг паст нархни (йиллик 9 миллион АҚШ доллари) таклиф этган Metito Utilities Limited компаниясини халқаро тендер ғолиби деб топган.

Эслатиб ўтамиз, «Наманган шаҳар оқова сув тозалаш иншоотини давлат-хусусий шериклик шартлари асосида қуриш» лойиҳасининг  қиймати 90 миллион АҚШ долларини ташкил этади. Лойиҳа муддати 25 йил бўлиб, шундан дастлабки 2 йил қурилиш даври этиб белгиланган.

Лойиҳа доирасида қуввати суткасига 100 минг метр куб оқова сувларини тозалашга мўлжалланган иншоот ва 7,5 км узунликдаги оқова сув тармоқларини қуриш назарда тутилган.

Аввалроқ Сирдарё вилояти ҳокими Осиё тараққиёт банки томонидан Ховос туманига сув таъминоти учун ажратилган 7 миллион доллардан ортиқ маблағ талон-торож қилингани ҳақида гапирганди. «Ўзсувтаъминот» акциядорлик жамияти маблағлар талон-торож қилинганини инкор этган. Жамият берган маълумотларга кўра, лойиҳа ҳоким таъкидлаганидек Осиё тараққиёт банки эмас, балки Жаҳон банки иштирокида амалга оширилган бўлиб, бунда Жаҳон банки томонидан 6 миллион 250 минг доллар, Ўзбекистон томонидан эса 1 миллион 60 минг доллар ажратилган.