Европадаги ерости газ омборларида сақланаётган газ ҳажми 40 фоиздан пастга тушди. Бу ҳақда ТАСС хабар берди.

Gas Infrastructure Europe (GIE) маълумотларига кўра, 27 январь куни Европада ерости газ омборлари (ЕГО)да газ билан тўлдирилганлик ҳажми 40 фоиздан пастга тушган. Бу 2011 йилдан бери биринчи марта бу қадар эрта содир бўлган.

Европадаги ЕГО объектларидан газ олиш 27 январь куни тахминан 660 миллион куб метрни ташкил қилган. Европадаги ЕГОларнинг тўлдирилганлик даражаси аллақачон 39,65 фоизга тушган — бу сўнгги беш йилдаги ўртача кўрсаткичдан 15,7 фоизга паст. Илгари календарь йили бошидан бери 40 фоиздан паст сақлаш захираларининг энг тез пасайиши 2017 йил 3 февралда содир бўлган. Бу йил бу кўрсаткичга бир ҳафта аввал эришилган.

Европа омборларида тахминан 42,8 миллиард куб метр газ мавжуд. Бу 2021 йилга нисбатан 15,9 миллиард куб метрга камроқ. Омбор захираларининг энг паст кўрсаткичи Австрия (23,26 фоиз), Нидерландия (27,49 фоиз) ва Болгарияда (32,92 фоиз) кузатилган. Германияда омборлар 38 фоизга, Францияда 37,4 фоизга, Италияда 50,9 фоизга, Буюк Британияда 67,2 фоизга тўлдирилган.

Суюлтирилган табиий газ терминалларидан Европа газ узатиш тизимига газ оқими рекорд даражада давом этмоқда. 27 январь куни терминаллардан суюлтирилган газ тушуми қарийб 434 миллион куб метрга етган. Бу ушбу сана учун рекорд кўрсаткич ва сўнгги беш йил ичида 20 январдаги ўртача кўрсаткичдан 2,4 баравар кўп. Европада суюлтирилган газни қайта газлаштириш ва уни қувурларга қуйиш қувватлари максимал 72 фоизда ишламоқда.

Умуман олганда, 27 январь ҳолатига кўра, ой бошидан бери Европа омборларига қайта газлаштирилган суюлтирилган газ оқими 10 миллиард куб метрдан сал кўпроқни ташкил қилган. 28 январь кунги натижалари бўйича 2019 йил январь ойидаги рекорд янгиланади ва ой охирига келиб, эҳтимол, 2019 йил ноябрь ойидаги газ тушумларининг мутлақ рекорди янгиланиши мумкин.

Европадаги суюлтирилган газни сақлаш резервуарларидаги суюлтирилган газ захиралари ҳам январь ойи ўрталарида анча юқори, аммо аллақачон беш йиллик ўртача кўрсаткичга тушиб кетган. Таъкидланишича, суюлтирилган газ ташувчи йигирмадан ортиқ танкерлар АҚШдан Европага йўл олмоқда — бу яқин келажакда Европада суюлтирилган газ захираларининг ўсишига янги туртки бериши мумкин.

Аввалроқ АҚШ ва Қатар Европага газ етказиб бериш бўйича музокара ўтказгани айтилгани хабар қилинганди.