Буюк Британиянинг Gor Investment Limited компанияси ўзининг шўъба корхонаси Asia Alliance Group МЧЖ билан биргаликда Asia Alliance Bank’нинг 77,2 фоиз улушига эга бўлди. Бу ҳақда «Тошкент» фонд биржаси сайтида хабар берилди.

Маълум бўлишича, келишув устав капиталига қимматли қоғозларни қўшиш бўйича биржадан ташқари битим шаклида амалга оширилган. Айни вақтда Asia Alliance Group’нинг устав капитали 6,77 миллиард сўмни ташкил этади, ягона таъсисчиси (иштирокчиси) Gor Investment Limited ҳисобланади.

Маълумот учун, молия институти 2020 йил май ойида қабул қилинган банк секторини ислоҳ қилиш стратегияси доирасида хусусийлаштирилган. 2021 йил ўрталарида банк веб-сайтида унинг акцияларини Gor Investment Ltd (Буюк Британия)га ўтказиш тўғрисида қарор қабул қилингани ҳақида хабар пайдо бўлганди.

2021 йил июль ойидан бошлаб, Марказий банк статистик маълумотларида банк «Давлат улуши иштирокидаги банклар» бўлимида кўрсатилишини тўхтатди. Бироқ, 2021 йил охирида ҳам Давлат активларини бошқариш агентлиги (ДАБА) Корхона ва ташкилотларнинг ягона давлат реестрида банкнинг ягона таъсисчиси сифатида қайд этилганди.

ОАВ хабарларига кўра, ДАБА ва Ўзбекистон Республикаси Молия вазирлиги 2022 йилнинг 21 январида банк филиаллари рўйхатидан чиқди.