Россия Ҳаво транспорти федерал агентлиги («Росавиация») вакили Валерий Кудинов Хитой Россияга самолёт қисмларини етказиб беришдан бош тортганини маълум қилди. Бу ҳақда «Коммерсантъ» хабар берди.

Маълум қилинишича, Россия самолёт қисмлари етказиб берувчиларни Туркия ва Ҳиндистон каби бошқа давлатлардан излайди.

Кудинов, шунингдек, самолётларнинг бир қисмини ижарага берувчиларга қайтариш кераклигини, аммо қайси ҳаво кемалар қайтарилишини авиакомпаниялар ҳал қилишини айтди. Унинг айтишича, Россия самолётлари билан боғлиқ вазият авиачипталар нархига таъсир қилмайди.

Кудиновнинг қўшимча қилишича, бир ой ичида 180 га яқин самолёт Россия фуқаролик ҳаво кемалари давлат реестрига ўтказилган, жумладан, «Аэрофлот», «Победа», Utair, «Россия» ва «Ижавиа»авиакомпанияларининг самолётлари. Бунгача Россия реестрида 70 га яқин самолёт бор эди.

Бундан ташқари, 10 март куни Россия Транспорт вазирлиги хорижий компаниялардан ижарага олинган хориж самолётларини мамлакатда сақлаб қолишни таклиф қилди.

Қайд этиш керакки, 26 февраль куни Европа Иттифоқи санкциялар пакети доирасида Россияга самолётларни етказиб бериш, сотиш, лизингга бериш, техник хизмат кўрсатиш ва суғурта қилишни тақиқлаганди. Бунга жавобан «Росавиация» Россия авиакомпанияларига хорижда самолётларнинг оммавий ҳибсга олиниши фонида барча халқаро рейсларни тўхтатишни тавсия қилди. «Аэрофлот», «Победа» ва S7 Airlines тавсияни амалга оширган.

Аввалроқ АҚШ Россияга қарши санкцияларни четлаб ўтадиган Хитой компанияларини огоҳлантиргани хабар қилинганди. Шунингдек, Boeing Россиядан титан сотиб олишни тўхтатгани ҳақида хабар берилди.