АҚШ Россияга қарши санкцияларни четлаб ўтадиган Хитой компанияларини огоҳлантирди
Яримўтказгич ишлаб чиқарувчи SMIC компаниясига Россия билан ҳамкорлик қилиш тақиқланиши мумкин.
АҚШ Россияга экспортга қўйилган чекловларни эътиборсиз қолдирадиган Хитой компанияларига нисбатан қаттиқ чоралар кўришга тайёр. Бу ҳақда АҚШ савдо вазири Жина Раймондо маълум қилди.
Раймондонинг сўзларига кўра, АҚШ Савдо вазирлиги Россияга қарши санкцияларни эътиборсиз қолдирадиган хитойлик компанияларга АҚШнинг аппарат ва дастурий таъминотидан фойдаланишни ман этади.
«Россия бизнинг санкцияларимиз ва экспорт назоратимизни четлаб ўтиш учун бошқа давлатлар билан тил бириктиради. Оқ уй Россияга чиплар ва бошқа технологияларни етказиб беришда давом этиб, АҚШ санкцияларига қарши бўлган яримўтказгичлар ишлаб чиқарувчи SMIC ёки бошқа Хитой компанияларини ёпиши мумкин», — деди Раймондо.
SMIC 2020 йилдан бери санкциялар остида, бироқ АҚШнинг баъзи компаниялари, жумладан Lam Research, Entegris, Qualcomm ва Applied Materials микроэлектроника яратиш технологиясини тақдим этиш учун АҚШ Саноат ва хавфсизлик бюросининг рухсати остида Хитой компанияси билан ҳамкорлик қилмоқда. Яъни, аслида АҚШ SMIC’га Россия билан ҳамкорлик қилишни тақиқлаши мумкин.
АҚШ, Европа Иттифоқи ва бошқа давлатлар Россиянинг Украинага ҳарбий ҳужумига жавобан қаттиқ санкциялар ва экспорт назоратини жорий қилди. Huawei’га нисбатан чекловлар асосида ёзилган экспорт чекловлари юқори технологияли айрим маҳсулотларни, жумладан, илғор яримўтказгичларни Россия ва Беларусга сотишни тақиқлаган.
Бундан ташқари, экспорт назорати чоралари нафақат Америка компанияларига, балки ўз маҳсулотларини ишлаб чиқариш учун Америка дастурий таъминоти ёки технологиясидан фойдаланадиган дунёнинг исталган нуқтасидаги компанияларга ҳам тегишлидир. Бунга Хитой компаниялари ҳам киради, Раймондонинг айтишича, улар мустақил равишда замонавий яримўтказгичларни ишлаб чиқара олмайди.
Яримўтказгичларни етказиб бериш бўйича энг таъсири кучли тақиқ Россия космик саноати учун бўлади. Тақиқ Россияда фуқаро авиациясининг ривожланишига ҳам таъсир қилиши мумкин.
Аввалроқ АҚШ сенаторлари Россия захираларидаги олтин билан операцияларни тақиқлашни таклиф қилгани ҳақида хабар берилганди. Шунингдек, Россия санкцияга учраган компаниялар сони бўйича Эронни ортда қолдиргани хабар қилинди.
