Шавкат Мирзиёев 10 март куни Тошкент халқаро инвестиция форумига тайёргарлик масалалари юзасидан йиғилиш ўтказди. Бу ҳақда Президент матбуот хизмати хабар берди.

Маълум қилинишича, форум 24–26 март кунларига режалаштирилган бўлиб, унда халқаро ташкилотлар ва молиявий тузилмалар, 56 та давлатдан 1500 нафардан зиёд йирик инвесторлар ва юқори мартабали меҳмонлар қатнашиши кутилмоқда. Хусусан, Европа тикланиш ва тараққиёт банки, Осиё тараққиёт банки президентлари, вазирлар, йирик корпорация ва компаниялар раҳбарлари иштирок этади.

Форум доирасида ялпи мажлис ва шўба мажлислари, давра суҳбатлари, тақдимотлар, брифинглар каби 40 дан ортиқ тадбирлар кўзда тутилган.

Қайд этилишича, анжуман Ўзбекистон иқтисодиёти учун зарур бўлган истиқболли лойиҳаларнинг тақдимот платформаси бўлиб хизмат қилади. Мамлакатдаги имкониятлар, хорижий инвесторлар учун яратилган шароитлар ва жозибадор йўналишлар таништирилади.

Йиғилишда форумга тайёргарлик ишларининг бориши ҳақида ахборот берилди. Жумладан, давлат раҳбари бундай инвестиция форуми Ўзбекистонда биринчи марта ўтказилаётганига эътибор қаратиб, уни юқори даражада ташкиллаштириш бўйича кўрсатмалар берди.

Шунингдек, мамлакатнинг халқаро бизнес ҳамжамиятига очиқлигини намойиш этиш, ҳар бир тармоқ ва ҳудуднинг инвестицион салоҳиятини кўрсатиш зарурлиги таъкидланди. Йирик лойиҳаларга илғор технологиялар ва инвестицияларни жалб қилиш бўйича аниқ натижаларга эришиш вазифаси қўйилди.

Аввалроқ Шавкат Мирзиёев Покистоннинг етакчи компаниялари раҳбарлари билан учрашгани ҳақида хабар берилганди. Шунингдек, Шавкат Мирзиёев айрим давлатлардаги вазият сабаб эҳтимолий оқибатларни юмшатиш бўйича топшириқ бергани хабар қилинди.