Эски намунадаги ҳайдовчилик гувоҳномасини онлайн алмаштириш мумкин
2023 йилнинг 30 январидан бошлаб эски намунадаги ҳайдовчилик гувоҳномасини уйдан туриб, my.gov.uz орқали олиш имконияти яратилди. Бунинг учун БҲМнинг 70 фоизи (210 000 сўм) миқдорида ҳамда почта хизматига 25 000 сўм тўлов амалга оширилади
Ўзбекистонда 2023 йилнинг 30 январидан бошлаб эски намунадаги ҳайдовчилик гувоҳномасини уйдан туриб, Ягона интерактив давлат хизматлари портали (my.gov.uz) орқали олиш имконияти яратилди. Бу ҳақда «Давлат хизматлари янгиликлари» Telegram канали хабар берди.
Маълум қилинишича, бу орқали аввалгидек ДХМ ва ички ишлар органларига бориш, расмга тушиш, бир-нечта ҳужжатларга имзо қўйиш ва навбат кутиш каби оворагарчиликларга барҳам берилган.
Бунинг учун my.gov.uz орқали буюртма бериш керак. Буюртмада:
- бўш қаторлар ўзингизга тегишли шахсий маълумотлар билан тўлдирилади;
- тегишли бандлар танланади;
- янги ҳайдовчилик гувоҳномаси етказиб бериладиган манзил кўрсатилади;
- мобил телефон ёки компьютер орқали шахсий имзо қўйлади.
Сўнги қадамда инвойс шакилланади ва БҲМнинг 70 фоизи (210 000 сўм) миқдорида ҳамда почта хизмати учун 25 000 сўм тўлов амалга оширилади.
Шунингдек, марказ ходими, келиб тушган буюртмани кўриб чиқиб, чоп этган янги намунадаги ҳайдовчилик гувоҳномасини почта хизматига тақдим этади.
«Почта хизмати томонидан икки иш кунида манзил бўйича етказилади ва сиздан эски намунадаги ҳайдовчилик гувоҳномасини ва талонни олиб, янгисини тақдим этади. Почта хизмати эски намунадаги ҳайдовчилик гувоҳномасини ва талонини ДХМга топширади», дейилади хабарда.
