Ўзбекистондан Афғонистонга темир йўл қатнови 1 февралдан вақтинча тўхтатилгани ҳақида хабар берилганди. «Ўзбекистон темир йўллари» АЖ Ғалаба—Ҳайратон темир йўли қачон очилишига аниқлик киритди.

Маълум қилинишича, Афғонистон томонидан Ҳайратон станциясида амалга оширилиши лозим бўлган техник ишлар белгиланган муддатларда амалга оширилмагани тўғрисида хеч қандай тушунтириш берилмаган.

Хайратон станциясига етказиб берилган вагонларни бўшатиш ва қайтариш ишларини ташкил этиш учун Афғонистон темир йўл бошқармаси «Мансор Фатеҳ» компанияси билан шартнома имзолагани тўғрисида маълумот тарқатилган. Аммо ушбу ташкилот 31 январга қадар Ҳайратон станциясида келишилган ишларни ташкиллиштиришга улгурмаган.

«Sogdiana Trans ШК томонидан тадбиркорлар билан учрашувлар ўтказилиб, уларни қўллаб-қувватлаш мақсадида вақтинчалик автомобиль транспорти орқали юклар ташувини ташкиллаштиришда ёрдам беришига қарамай, қўшни давлат томони тадбиркорларга юкларни автомобиль транспорти орқали ташимаслик тўғрисида тавсия бераётгани хақида маълумотлар келмоқда», дейилади ахбротда.

«Ўзбекистон темир йўллари»га кўра, Афғонистон темир йўл бошқармаси раҳбариятининг илтимосига кўра кейинги ҳафта бошида Термиз шаҳрида Афғонистонга темир йўл орқали юкларни ташишни ташкил этиш, Ҳайратон станциясига етказиб бериш ва олиб чиқишни ташкил этиш бўйича Sogdiana Trans ва Афғонистон темир йўл бошқармаси ўртасида янги шартнома имзоланиши режалаштирилмоқда.