“Meduza” nashri oʻz manbalariga tayanib xabar berishicha, Rossiya hukumati soʻnggi paytlarda migrantlarga nisbatan choralarni kuchaytirish orqali aholi eʼtiborini urush va narxlarning koʻtarilishidan chalgʻitishni maqsad qilgan.

Qayd etilishicha, mamlakatda kadrlar yetishmovchiligi kuzatilayotganiga qaramay, 20 ta hududda xorijlik ishchilar faoliyatiga cheklovlar joriy qilingan. Iyul oyida esa Rossiya parlamenti tomonidan migrantlarni chiqarib yuborishga qaratilgan maxsus qonun qabul qilingan.

Huquq-tartibot idoralari tomonidan tez-tez oʻtkazib turiladigan reydlar, siyosat arboblarining migrantlarga qarshi kayfiyati ham, ayniqsa shu yilning mart oyi oxirida Moskvadagi “Krokus Siti Holl”da terakt sodir etilganidan soʻng kuchaygan.

Nashrning alohida eʼtibor qaratishicha, teraktdan soʻng ommaviy axborot vositalarida mehnat migrantlarining qonunbuzarliklari haqidagi xabarlar koʻproq yoritila boshlangan. Rossiya Liberal-demokratik partiyasi yetakchisi Leonid Slutskiy esa Davlat Dumasiga migrantlarning oilalarini Rossiyaga kirishini taqiqlashni nazarda tutuvchi qonun loyihasini kiritdi.

Shu bilan birga, Rossiyaning bir qator hududlarida migrantlarning maʼlum sohalarda ishlashini taqiqlanmoqda. Masalan, Moskva viloyatida xorijlik ishchilar endilikda umumiy ovqatlanish muassasalariga ishga joylasha olmaydi, alkogol va tamaki sotolmaydi. Chelyabinsk viloyatida esa migrantlarning savdo sohasida, shuningdek, avtomashina ustaxonalarida ishlashi man etildi.

“Meduza” Kremlga yaqin manbasiga tayanib xabar berishicha, migrantlarga nisbatan bosimni oshirish orqali Rossiya hukumati jamoatchilik eʼtiborini boshqa muammolar – urush va narxlarning oʻsishidan chalgʻitmoqchi.

“Odamlarni haqiqatan ham odamlarni kun tartibidagi muhim muammolardan chalgʻitish oson boʻlgan anʼanaviy mavzular toʻplami mavjud. Migrantlar mavzusi shular jumlasidandir va buni amalga oshirish juda oson: migrantlar ishtirokidagi mojaro, ularning biror aholi punkti aholisi bilan qarama-qarshiligi haqida yoritish, keyin esa kuch ishlatuvchi organlarning muammoni qanday hal qilishini koʻrsatish – noqonuniy odamlarni qidirish, deportatsiya qilish”, – deydi “Meduza” manbasi.

Aniqlik kiritilishicha, Rossiya aholisi oʻrtasida ayni paytda migrantlarga nisbatan munosabat haqiqatan ham salbiy. Bu ayniqsa, Moskva viloyatida yaqqol seziladi. Butunrossiya jamoatchilik fikrini oʻrganish markazi oʻtkazgan ijtimoiy soʻrovda respondentlarning 52 foizi mehnat migrantlari va ularning oilalarini Rossiyaga kiritmaslik kerak, deb hisoblagan.

Jamoatchilik eʼtiborini chalgʻitish uchun migrantlar mavzusidan foydalanish ish berishi mumkin, biroq buning Rossiya uchun zararli jihatlari ham yoʻq emas. Shundoq ham Rossiyada demografik holat yomonlashib, ishchi kuchiga boʻlgan talab ortib borayotgan bir paytda urush va rublning qadrsizlanishi tufayli migrantlarning ommaviy chiqib ketishi ham kuzatilmoqda. Xususan, ushbu mamlakatda ishlayotgan oʻzbekistonliklar soni 2016-yilgacha boʻlgan 4-6 million nafardan, ayni paytga kelib 1 millioncha kamayib ketgan. Shuningdek, yil oxirigacha bu miqdor kamayishi prognoz qilingan.

Ayni paytda Oʻzbekiston hukumati ham tashqi mehnat bozorlarini diversifikatsiya qilish ustida faol ishlamoqda. Sentyabr oyida Germaniya federal kansleri Olaf Sholsning Oʻzbekistonga tashrifi davomida aynan malakali mehnat migrantlari: hamshiralar, avtobus haydovchilari va temir yoʻl xodimlarini qayta tayyorlash hamda ularni Germaniyaga ishga yuborish masalasida kelishuvga erishilgan edi.