Ўзбекистон май ойида тўхтатилган олтин экспортини ҳозирча қайта тикламади. Бу ҳақда Миллий статистика қўмитаси маълумотларида келтирилган.

Жорий йилнинг биринчи ярим йиллигида мамлакат экспорти $15,86 млрдни ташкил этиб, ўтган йилнинг шу даврига нисбатан 8,8% га камайди. Бунга асосан олтин экспортининг қисқариши сабаб бўлган.

Шу билан бирга, саноат маҳсулотлари экспорти қарийб 23% га ошиб $2,4 млрдга, хизматлар экспортидан тушган даромад эса 35% дан кўпроқ ўсиб $6,19 млрдга етди.

Январь—июнь ойларида Ўзбекистон $1,5 млрдлик олтин экспорт қилди. Бу ўтган йилнинг мос давридаги $6,49 млрдга нисбатан 4,3 баравар кам. Мамлакат апрель ойида олти ойлик танаффусдан сўнг олтин экспортини қайта бошлаган, бироқ май ойида қимматбаҳо металл экспорти яна тўхтатилган.

Жаҳон бозорида олтин нархи июнь ойида бир троя унцияси учун $4500 дан $4020 долларгача пасайди. Июль бошида нарх $4200 га яқинлашган бўлсада, кейин яна $4000 атрофга тушди ва ойнинг иккинчи ярмида асосан $4100 атрофида тебраниб турди.

Ўзбекистон апрель ойигача охирги марта 2025 йил центабрида $1,47 млрдлик олтин экспорт қилган эди. 2025 йил якунларига кўра, қимматбаҳо металл экспорти $9,9 млрддан ошиб, тарихдаги энг юқори кўрсаткични қайд этди.

Навоий кон-металлургия комбинати жорий йил бошидан буён олтин қазиб олиш ҳажмини ўтган йилнинг биринчи ярмига нисбатан қарийб 2% га камайтириб, 1,508 млн троя унцияси (46,9 тонна)га туширди. Бироқ пул ифодасида ишлаб чиқариш ҳажми 41,7% га ошиб, 86,2 трлн сўмни ташкил этди.

Июль ойи бошида Ўзбекистоннинг олтин-валюта захиралари $63,75 млрдни ташкил этди. Бир ой ичида улар $6,82 млрдга камайди ва ўтган йил охиридан бери энг паст даражага етди. Пасайишнинг асосий қисми олтин захираларига тўғри келди — унинг қиймати $5,68 млрдга камайиб, $55,75 млрдни ташкил этди. Шу билан бирга, унинг физик ҳажми 13,88 млн троя унциясига (431,7 тонна) кўтарилди.