Июнь ойида Ўзбекистонда кўчмас мулк бозоридаги фаоллик сезиларли ошди. Бу ҳақда Иқтисодий тадқиқотлар ва ислоҳотлар маркази таҳлилида келтирилган.

Марказ маълумотларига кўра, ўтган ойда кўчмас мулк олди-сотди битимлари сони 25 мингдан ошиб, май ойига нисбатан 23% га кўпайган.

Битимлар сонининг ўсиши мамлакатнинг барча ҳудудларида кузатилган. Ойлик ҳисобда энг юқори ўсиш Бухоро вилоятида — 50,1%, Навоийда — 41,5% ва Самарқандда — 31,8% қайд этилган. Нисбатан мўътадил ўсиш Андижон (17,9%), Тошкент вилояти (12,2%) ҳамда Хоразм (0,9%) вилоятларида кузатилган.

Йиллик ҳисобда эса энг юқори ўсиш Тошкент шаҳрида — 35,7%, Сирдарёда — 26,9%, Навоийда — 26,3% ва Қорақалпоғистонда — 23,3% қайд этилган. Шу билан бирга, Жиззах (5,7%), Фарғона (3,6%) ва Тошкент вилояти (3,3%) да ўсиш суръатлари нисбатан паст бўлган.

Шунингдек, 2026 йилнинг биринчи ярми якунларига кўра, мамлакатда 171 мингдан ортиқ кўчмас мулк олди-сотди битими расмийлаштирилган. Бу ўтган йилнинг мос даврига нисбатан 25,3% ёки 34,5 мингта кўпдир.

Январь июнь ойларида барча ҳудудларда кўчмас мулк олди-сотди битимлари сони ошди. Энг юқори ўсиш Сирдарё (36,4%), Тошкент шаҳри (34,9%) ва Навоий (30%) ҳиссасига тўғри келган. Хоразм (16,7%), Бухоро (15,4%) ва Фарғона (12,1%) вилоятларида эса ўсиш суръатлари нисбатан мўътадил бўлган.

2026 йилнинг биринчи ярмида Ўзбекистонда 13,1 трлн сўмлик ипотека кредитлари ажратилди, бу ўтган йилнинг мос даврига нисбатан 38% кўп. Кредитлар 42,6 минг нафардан ортиқ фуқарога берилган бўлиб, маблағларнинг 75%и бирламчи уй-жой бозорига йўналтирилди. Ҳудудлар орасида энг катта ҳажмдаги ипотека кредитлари Тошкентга (4,01 трлн сўм) тўғри келди.