500 АҚШ долларигача нақд чет эл валютасини паспортсиз харид қилиш мумкин бўлади
9 августдан бошлаб жисмоний шахслар томонидан нақд чет эл валютасини сотиб олишда шахсни тасдиқловчи ҳужжат талаб этиладиган лимит оширилади.
Тижорат банкларида жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича ички назорат қоидаларига қўшимча ва ўзгартиришлар киритилди.
2026 йил 9 августдан бошлаб жисмоний шахслар томонидан нақд чет эл валютасини сотиб олишда шахсни тасдиқловчи ҳужжат талаб этиладиган лимит 100 АҚШ долларидан 500 АҚШ долларигача оширилади.
Ўзгаришларга кўра, эквиваленти 500 АҚШ долларигача бўлган нақд чет эл валютасини харид қилишда шахсни тасдиқловчи ҳужжатни тақдим этиш талаб этилмайди.
Шу билан бирга, мазкур қарор билан жиноий даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасидаги ички назорат механизмларини такомиллаштиришга қаратилган бошқа бир қатор ўзгартиришлар ҳам киритилган бўлиб, улар ҳам жорий йилнинг 9 августидан кучга киради.
