Тошкентда қиймати 1 миллиард долларга тенг бўлган 100 километрлик икки қаватли пулли айланма автомобиль йўлини қуриш масаласи кўриб чиқилмоқда. Бу ҳақда Халқ депутатлари Тошкент шаҳар кенгашининг 22 июлдаги пойтахт автомобиль йўлларини қуриш, реконструкция қилиш ва сақлаш ҳолатига бағишланган қарорида сўз боради.

Ҳужжатга кўра, халқаро молия институтлари ва йирик йўл-қурилиш компаниялари билан ҳамкорлик доирасида бир қатор йирик инфратузилма лойиҳаларини амалга ошириш бўйича келишувларга эришилган. Гап қатъий битимлар ҳақида эмас, балки имзоланган меморандумлар ҳақида бормоқда.

Жумладан, China Railway Construction компанияси билан биргаликда Тошкент атрофида 100 километрлик икки қаватли пулли айланма йўл қуриш режалаштирилмоқда. Лойиҳанинг дастлабки қиймати 1 миллиард долларни ташкил этади. Лойиҳанинг бошқа тафсилотлари очиқланмаган.

Хитойнинг SINO-Hunan компанияси билан ҳам қиймати 1 миллиард долларлик яна бир лойиҳани амалга ошириш бўйича меморандум имзоланган. Унда 7 та туннель ва 5 та йўлўтказгич қуриш, 16 та кўчада 57 километрлик тезкор автобус йўналишлари (BRT) коридорларини ташкил этиш, шунингдек, 279 километрлик йўлларни қуриш ва реконструкция қилиш кўзда тутилган.

China Construction компанияси 3 та йўлўтказгич ва 4 та кемпинг ҳудудини қуришга, шунингдек, 27 километрлик йўлларни капитал таъмирлашга 500 миллион доллар сармоя киритиши мумкин.

Shanghai Construction билан эса 100 миллион доллар эвазига кемпинг маркази қуриш ва 7,7 километрлик йўлларни таъмирлаш муҳокама қилинмоқда.

Бундан ташқари, Xinjiang Hui’er Agricultural компанияси билан ландшафт дизайни лойиҳалари асосида йўл бўйи ҳудудларини кўкаламзорлаштириш бўйича дастлабки келишувларга эришилган.

Май ойида Тошкент шаҳар ҳокимлиги China Railway Construction Corporation билан узунлиги 100 километрга яқин бўлган пулли айланма йўл қурилишини муҳокама қилаётганини маълум қилган эди. Томонлар, шунингдек, пойтахт марказидан бўлажак «Янги Тошкент» халқаро аэропорти йўналишида пулли магистраль қуриш лойиҳасини ҳам кўриб чиқишган.