Uzum Tezkor компанияси устун мавқега эга рақамли платформа оператори сифатида эътироф этилди, дея хабар бермоқда Рақобатни ривожлантириш ва истеъмолчилар ҳуқуқларини ҳимоя қилиш қўмитаси.

Компания томонидан тайёр овқат ҳамда бошқа истеъмол маҳсулотларини буюртма бериш ва етказиб бериш агрегатори хизмати бозорида устун мавқега эришгани тўғрисида қўмитага тақдим этилган хабарнома бунга асос сифатида олинди.

Рақобат қўмитаси қонун ҳужжатларига мувофиқ, платформанинг устун мавқеини суиистеъмол қилиш ҳолатларини олдини олиш мақсадида мажбурий тартибда Монополияга қарши комплаенс тизими жорий этади ва тегишли тартибда мониторинг ўтказиб боради.

Аввалроқ Uzum Market маркетплейси ҳам электрон савдо майдончалари бозорида устун мавқега эга деб топилганди.

Маълумот учун, устун мавқе — бу товар ёки молия бозорида хўжалик юритувчи субъектнинг ёхуд шахслар гуруҳининг рақобатлашувчи хўжалик юритувчи субъектларга боғлиқ бўлмаган ҳолда унга ўз фаолиятини амалга ошириш ва рақобатнинг ҳолатига ҳал қилувчи таъсир кўрсатиш, тегишли бозорга бошқа хўжалик юритувчи субъектларнинг киришини қийинлаштириш ёхуд уларнинг иқтисодий фаолият эркинлигини бошқача тарзда чеклаш имкониятини берадиган ҳолат. Агар компания ёки шахслар гуруҳининг бозор улуши 40 фоиз ёки ундан юқори бўлса, шунингдек, бошқа ҳолларда маҳсулот ёки молия бозоридаги устун мавқе тан олинади.