Ҳукуматнинг 23 июль куни суғурта бозорини такомиллаштиришга қаратилган қарори қабул қилинди. Бу ҳақда Истиқболли лойиҳалар миллий агентлиги хабар берди.

Ҳужжат Шавкат Мирзиёевнинг 2024 йил март ойида суғурта хизматлари бозорини ривожлантириш тўғрисидаги қарорида белгиланган вазифаларни амалга ошириш чора-тадбирларини белгилайди. Хусусан, автотранспорт эгаларининг фуқаролик жавобгарлигини мажбурий суғурта қилиш тартиби ўзгаради.

Автомобиль эгалари учун суғурта тарифлари актуар ҳисоб-китоблар асосида қайта кўриб чиқилди. Суғурта пули ва суғурта мукофотлари миқдори бозор тамойилларига мувофиқ белгиланади, дея қайд этди ИЛМА.

2026 йил 1 январдан бошлаб транспорт воситалари эгаларининг фуқаролик жавобгарлигини мажбурий суғурта қилиш бўйича суғурта суммасини 80 млн сўмгача (амалда 40 млн сўм) оширилиши белгиланди.

Бу ўз навбатида ЙТҲ натижасида жабрланган шахсларнинг мол-мулкига, ҳаётига ва соғлиғига етказилган зарар миқдорини қоплаш учун йўналтириладиган маблағнинг бугунги кун талабига мос равишда бўлишига хизмат қилади.

Шунингдек, ҳайдовчилар сонига қараб чекланган ва чекланмаган полисларни расмийлаштириш механизми белгиланмоқда.

Бунда айбдор деб топилган суғурта қилдирувчининг суғурталовчиси томонидан суғурта даъволари ва бошқа низоларни кўриб чиқиш тартиби аниқлаштирилди.

Суғурта тўловларини кафолатлаш жамғармасига транспорт воситалари эгаларининг фуқаролик жавобгарлигини мажбурий суғуртаси билан боғлиқ масалалар юзасидан ҳуқуқий маслаҳат ҳамда ЙТҲ тўғрисидаги хабарнома билан боғлиқ аджастерлик хизматини кўрсатиш функцияси қўшилди.

Мажбурий суғурталаш мажбуриятининг бажарилишини назорат қилиш учун масъул органлар ва Ягона автоматлаштирилган ахборот тизимини юритиш тартиби аниқлаштирилди.

Қарор билан манфаатдор давлат органлари билан мажбурий суғурта бўйича электрон маълумот алмашинуви йўлга қўйилиши белгиланди.

2026 йил 1 апрелдан Ягона суғурта биллинг тизими жорий этилади. Бу полисларни расмийлаштиришда суғурта мукофотлари тушумларининг марказлаштирилган ҳисобини юритилишини таъминлайди.

Фуқаролик жавобгарлигини мажбурий суғурта қилмаган шахсларни маъмурий жавобгарликка тортиш механизмларини такомиллаштиришни назарда тутувчи қонун лойиҳасини Вазирлар Маҳкамасига киритиш топширилди.