2025 йилнинг январь июнь ойларида Ўзбекистонда автомобиль ишлаб чиқариш бироз ошди, дея хабар бермоқда Миллий статистика қўмитаси.

Биринчи ярим йилликда 185,6 минг дона енгил автомобиль ишлаб чиқарилди, бу 2024 йилнинг шу давридаги кўрсаткичдан 4,61% кўпдир.

Мамлакатда ишлаб чиқарилган ҳар уч автомобилдан бири Chevrolet Cobalt бўлиб, унинг ишлаб чиқарилиши атиги 0,2% га ошиб, 73,1 минг донага етди. Cobalt ишлаб чиқариш ҳажми 2024 йилнинг тегишли даврларига нисбатан кетма-кет уч ой давомида пасаймоқда: апрель ойида 6% га, май ойида 10,6% га, июнь ойида эса 7,84% га камайди.

Ишлаб чиқариш ҳажми бўйича иккинчи ўринда Damas сақланиб қолмоқда — 45,9 минг дона автомобиль (+18,1%). Chery’да салбий динамика қайд этилди (-0,7%) — 4161 та автомобиль. Onix ҳам ўз кўрсаткичларини 1% га пасайтириб, 17,24 минг донагача туширди.

Tracker ишлаб чиқариш ҳажми 22,84 минг автомобилгача ўсиб (+6,3%), Kia автомобиль ишлаб чиқаришни 26,9% га кўпайтириб, 11,76 минг донага етказди. Haval эса ишлаб чиқаришни 6,5 баробарга ошириб, 3538 та енгил автомобиль чиқарди. Бундан ташқари, Жиззах вилоятидаги BYD заводи 7000 та электромобиль ишлаб чиқарди.

Ўзавтосаноат маълумотларига кўра, ярим йил давомида 172,2 мингдан ортиқ автомобиль сотилган. UzAuto Motorsʼнинг бозордаги улуши 54,6% гача пасайган бўлиб, кейинги ўринларни Хоразм Авто (27,8%), ADM Жиззах (11,4%) ва BYD Ўзбекистон заводи (5,6%) эгаллаган. Қолган учта ишлаб чиқарувчининг умумий улуши 0,6 фоиздан ошмагани қайд этилган.

Брендлар орасида Chevrolet етакчиликни сақлаб қолмоқда — 141,9 мингдан зиёд автомобиль (тахминан ярми Cobaltга тўғри келади). Kia савдоси 11,36 минг автомобилга етди, BYD эса 9708 та электромобиль сотди. Энг яхши бешликка Chery ва Haval ҳам кирди — мос равишда 4614 ва 3697 та енгил автомобиль билан.

Моделлар кесимида биринчи бешта ўринни Чевролет Cobalt, Damas, Tracker, Labo ва Onix эгаллади — улар жами сотувларнинг 81,7 фоиздан ортиғини ташкил этади. Шунингдек, ўнталикка Kia Sonet, учта BYD ва Haval M6 моделлари кирди.