10 июлдан ипотека кредитлари учун субсидия олишга аризалар қабули бошланади. Бу ҳақда Иқтисодиёт ва молия вазирлиги матбуот хизмати хабар бермоқда.

Бунда жорий йил учун белгиланган мақсадли кўрсаткичлар доирасида ипотека кредитлари бўйича ажратилган субсидия хабарномаларининг фойдаланилмаган қисмига қабул амалга оширилади.

Аризаларни 10 июль куни соат 09:00 дан бошлаб Давлат хизматлари марказларига бевосита мурожаат қилиш ёки Ягона портал орқали онлайн жўнатиш мумкин.

Талабгор ва унинг яқин қариндошларининг (бунда яқин қариндошлар аризада кўрсатилган ҳолларда) ўртача даромади қуйидагича бўлиши керак:

• Қорақалпоғистон ва вилоятларда — МҲТEКМнинг 2,7 баравардан 8 бараваргача (3,118 млн — 9,24 млн сўм);
• Тошкент шаҳрида — МҲТEКМнинг 2,7 баравардан 9,2 бараваргача (3,118 млн — 10,626 млн сўм).

Субсидия учун ариза берувчи ижтимоий мезонлар асосида камида 30 балл тўплаши лозим. Ижтимоий ҳимояга муҳтож шахслар алоҳида тартиб асосида баҳоланади.

Шунингдек, аризачи ёки унинг турмуш ўртоғининг номида бутун мамлакат бўйлаб мулк ҳуқуқи асосида турар жой мавжуд бўлмаслиги керак.

Уй-жой сотиб олишда ипотека кредити бўйича бошланғич тўлов ва фоизларнинг бир қисмини қоплашга буджетдан маблағ ажратилади. Кредит фоиз тўловларининг бир қисмини қоплаш учун субсидиялар Марказий банкнинг асосий ставкасидан ошган қисмига тўлаб берилади.

Субсидиялар бирламчи бозордан уй-жой сотиб олиш учун амал қилади, ипотека кредитлари бўйича бошланғич тўловни қоплашга 30 млн сўм ажратилади. Жорий йилги дастур доирасида 30 минг нафар талабгорга субсидия ажратиш белгиланганди.

Ягона портал орқали онлайн ариза топширишда ҳеч қандай ҳужжат талаб этилмайди ва аризачи ҳақидаги маълумотлар порталда автоматик равишда шаклланади. Биринчи қадамда ариза юборувчи танланади. Агар номзод ўз номидан ариза топширмоқчи бўлса, «аризачининг ўзи» тоифасини танлаши керак.