Қонунчилик палатаси исломий банк фаолиятини жорий қилишга қаратилган қонун лойиҳасини иккинчи ўқишда кўриб чиқди. Бу ҳақда қуйи палата матбуот хизмати хабар берди.

Ҳужжат Солиқ ва Фуқаролик кодексларига ҳамда 8 та бошқа қонунга ўзгартиш ва қўшимчалар киритишни назарда тутади. Унда Ўзбекистонда ислом банклари фаолиятининг ҳуқуқий асосларини белгилаш масаласи кўриб чиқилмоқда.

Ислом молияси билан боғлиқ асосий атамалар, жумладан, «ислом банки» тушунчаси аниқланмоқда. Қонун лойиҳаси исломий банк фаолиятини амалга ошириш учун лицензия олиш талабларини ўз ичига олади.

Бундан ташқари, исломий банк соҳасида фаолият юритувчи кредит муассасалари ислом молияси стандартларига мувофиқ мижозларни молиялаштириш бўйича савдо фаолиятини олиб бориш ҳуқуқига эга бўлади.

Уларга юридик шахслар ташкил этиш, бошқа юридик шахсларнинг устав фондларидаги улушлар ёки акцияларни сотиб олишга рухсат берилади.

Депутатларнинг таъкидлашича, иккинчи ўқишга тайёргарлик жараёнида молиявий стандартлар ва инвестиция депозитлари бўйича таклифлар инобатга олинган. Ҳужжатга исломий молиявий операцияларни солиққа тортишни тартибга солувчи ва уларнинг ҳажмини оширишга қаратилган нормалар киритилди.

Сессияда иштирок этган 127 нафар депутатдан 125 нафари иккинчи ўқишда ёқлаб овоз берди, бир нафари бетараф қолди, яна бири овоз беришда қатнашмади. Якуний ўқишда ҳужжатни қўллаб-қувватлаб 126 киши овоз берди.

Энди қонун лойиҳаси Сенат томонидан маъқулланиши керак. Шундан сўнг ҳужжат имзолаш учун президентга киритилади.

Центабр ойида Олий Мажлис Қонунчилик палатаси Ўзбекистонда исломий банк фаолиятини жорий этиш тўғрисидаги қонун лойиҳасини биринчи ўқишда маъқуллади.

Ҳужжат исломий банклар учун алоҳида лицензия ва оддий банкларда «исломий дарчалар»ни очиш имкониятини назарда тутади, шунингдек, асосий маҳсулотлар — Муробаҳа, Музораба, Мушорака, Вакала ва Салам каби операцияларнинг асосий жиҳатларини белгилайди.

Марказий банк исломий молия стандартларини белгилаш ва банклар ҳузуридаги шариат кенгашларини назорат қилиш ҳуқуқига эга бўлади. Бундай ташкилотлар учун солиқ имтиёзлари берилади ва уларнинг нотариал ҳаракатлари мол-мулкни расмийлаштиришда давлат божидан озод этилади. Шунингдек, Марказий банк 2030 йилгача камида 10 та исломий банк пайдо бўлишини кутмоқда.