Ўзбекистонда табиий газ тармоғи етиб бормаган ҳудудлар учун электр энергияси тарифларини ўзгартириш режалаштирилмоқда. Бу ҳақда энергетика вазири Шерзод Хўжаев хабар берди.

Вазирнинг айтишича, президент топшириғига кўра, газ таъминоти мавжуд бўлмаган ҳудудларнинг ўзига хос хусусиятидан келиб чиқиб, электр энергияси тарифларини қайта кўриб чиқиш режалаштирилмоқда.

Қайд этилишича, ҳозирда қарийб 2 мингта маҳаллага табиий газ етиб бормаган. Ушбу ҳудудларда яшовчи аҳоли уйларини электр энергияси ёрдамида иситишга мажбур бўлса-да, бунинг учун ҳеч қандай чегирма олмаяпти ва электр энергияси учун тўлиқ тариф бўйича ҳақ тўламоқда.

Шу муносабат билан энергия ресурслари билан таъминланганлик даражаси, ҳудуднинг хусусияти ҳамда кўп қаватли ёки якка тартибдаги уй-жой экани инобатга олинадиган индивидуал тарифлаш тизимини жорий этиш режалаштирилмоқда.

Энергетика вазирининг таъкидлашича, табиий газ тармоғи мавжуд бўлмаган ва электр энергиясидан иситиш мақсадида фойдаланаётган истеъмолчилар электр энергияси учун чегирма олиш ҳуқуқига эга бўлиши керак.

Шавкат Мирзиёев раислигида 27 июль куни бўлиб ўтган видеоселектор йиғилишида Янгийўл туманини электр ва газ таъминоти бўйича намунавий ҳудудга айлантириш ҳамда бу тажрибани республиканинг барча туман ва шаҳарларида жорий этиш вазифаси белгиланганди.

Бунинг учун Янгийўл тумани аҳолиси ва тадбиркорларини электр ҳамда газ билан барқарор таъминлаш бўйича махсус штаб тузилган. Унга энергетика вазири Шерзод Хўжаев раҳбар этиб тайинланган, туман ҳокими Санъат Жуманиёзов эса унинг ўринбосари бўлган.