Павел Дуров Telegram каналларда реклама кўрсатишни ўчириб қўювчи пулли функция устида ишлаётганини айтди. Бу ҳақда мессенжер раҳбари ўзининг расмий каналида ёзмоқда.

Дуровнинг сўзларига кўра, кўпчилик фойдаланувчилар Telegram расмий рекламаларни ўчириш имкониятини жорий этишни таклиф қилган.

«У арзон обуна кўринишида чиқарилиши мумкин, бу фойдаланувчиларга Telegram ривожланишини бевосита молиявий қўллаб-қувватлаш имконини беради», — деди мессенжер асосчиси.

Унинг сўзларига кўра, каналлар муаллифлари рекламани ўчириб қўйиш имкониятига эга бўлишни хоҳлайди. Ҳозирда компания бу вариант учун ҳам иқтисодий шартларни ҳисоблаб чиқмоқда.

“Реклама берувчилар тез орада исталган каналга ‘кўринмас’ реклама жойлаштиришлари мумкин бўлади. Агар ҳар бир таассурот учун етарли нарх бўлса, бу каналда ҳеч қандай реклама бўлмайди», — дея қўшимча қилди Дуров.

Telegram раҳбарининг ёзишича, мессенжернинг зарарсиз лойиҳага айланишига имкон берувчи функциялар устида ишлашда давом этилади. Бу жараёнда фойдаланувчилар ва контент муаллифларининг манфаатлари устуворлигича қолади.

Аввалроқ Telegram мессенжердаги каналларга расмий рекламалар юборишни бошлаши ҳақида хабар берилганди.