Германия ва Австриянинг йирик авиакомпаниялари Украинага парвозларни тўхтатди
Парвозларга қўйилган чекловлар февраль ойи охирига қадар амал қилади.
Германиянинг Lufthansa авиакомпанияси 21-28 февраль кунлари Киевга парвозларни тўхтатганини маълум қилди. Бу ҳақда РИА Новости хабар берди.
Қайд этилишича, Германия ташқи ишлар вазирлиги 19 февраль куни мамлакат фуқароларини Украинани тарк этишга чақирган.
«Lufthansa Киевга ва Киевдан парвозларни тўхтатмоқда. Бу 2022 йил 21 февралдан 28 февралгача бўлган барча рейсларга тааллуқлидир. Lufthansa вазиятни доимий равишда кузатиб боради ва кейинги парвозлар бўйича қарорни кейинроқ қабул қилади», дейилади компания баёнотида.
Бундан ташқари, Austrian Airlines 20 февралдан ой охиригача Украинадаги кескин вазият туфайли Киев ва Одессага парвозларни вақтинча тўхтатди. Бу ҳақда компания вакили ТАСС агентлигига хабар берди.
«Ҳа, биз ҳам Киев ва Одессага парвозларни шу ой охиригача тўхтатамиз», — дейди авиакомпания вакили.
Унинг сўзларига кўра, компания доимий равишда Украина узра парвозлар хавфсизлиги билан боғлиқ вазиятни таҳлил қилиб келган ва 19 февраль куни Австрия Ташқи ишлар вазирлиги томонидан эълон қилинган огоҳлантириш сабабли рейсларни тўхтатиш қарорини қабул қилган.
Аввалроқ Украинадаги вазиятнинг иқтисодий оқибатларидан энг кўп зарар кўрадиган МДҲ давлатлари прогноз қилинганди.
