Солиқ қўмитаси раиси Шерзод Кудбиев Ўзбекистонда солиқ солиш тизимини унификация қилиш тарафдори эканини билдирди. Бу ҳақда у 5 июль куни Савдо-саноат палатаси томонидан меҳмонхона соҳаси ва аудиторлик ташкилотлари вакиллари билан ўтказилган очиқ мулоқотда қайд этди.

Унинг сўзларига кўра, хизмат кўрсатиш соҳасида қўшилган қиймат солиғи (ҚҚС) суммаси паст ҳисобга олиниши кузатилмоқда, чунки таннархнинг асосий қисми ходимларнинг иш ҳақига тўғри келади. Амалдор бу бизнеснинг сояга кетиши ёки парчаланишига олиб келишини таъкидлаб, тиббий хизматларни мисол қилиб келтирди. «Агар биз солиқ юкини камайтирсак, ҳажмлар очиқлиги ҳисобига буджет пул йўқотмайди», — деди у.

Солиқ қўмитаси раҳбарининг тушунтиришича, 1 млрд сўмлик ҚҚС тўлашга ўтиш чегараси кейинчалик уни ошириш учун киритилмаган. Мақсад — бухгалтерларга ҚҚС билан ишлашга тайёргарлик кўриш учун мослашиш даврини бериш.

«Ҳамма ҚҚС тўловчиси бўлиши керак. Бизда солиққа тортишнинг бешта тури бор. Битта солиқчи ҚҚСни ҳам, фойда солиғини ҳам, айланмадан олинадиган солиқни ҳам, қатъий белгиланган солиқни ҳам, ўзини ўзи банд қилганлар учун тизимни ҳам тушуниши керак. Бу эса маъмуриятчиликни мураккаблаштиради, кўплаб хатоларга олиб келади ва, афсуски, коррупцияга замин яратади», — деди Шерзод Кудбиев.

У бу масала бўйича комплекс ечим яратишга ваъда бериб, Халқаро валюта жамғармаси ҳам солиққа тортиш тизимини унификация қилишни тавсия қилганини қўшимча қилди. «Бу дарров амалга ошмайди, чунки молия йили тугаши керак», — дея хулоса қилди у.