Хитой Ойга 3 та миссия юборади
Хитой сунъий йўлдош ресурсларини ривожлантириш дастури доирасида кейинги 10 йил ичида Ойга 3 та учувчисиз миссияни амалга оширишни режалаштирмоқда. Миссия Хитой «Чанъе-5» миссияси доирасида Ой юзасида номаълум минерални топганидан сўнг ундан энергия манбаси сифатида фойдаланиш умидида амалга оширилади.
Хитой Миллий космик маъмурияти «Чанъе» космик дастури доирасида 10 йил ичида Ойга 3 та учувчисиз қурилма юборишга рухсат олди. Бу ҳақда Хитой Марказий Телеведениясига таяниб Bloomberg хабар берди.
Бу хабар Хитойнинг Global Times газетаси Чанъе миссияси доирасида Ой тупроғида янги минерал топилгани ҳақида маълум қилганидан бир кун ўтиб эълон қилинди. «Чанъе тоши» (Changsite-(Y)) деб аталувчи рангсиз шаффоф кристалл келажакда энергия манбаи сифатида қабул қилинади.
«Бу инсоният томонидан Ойда кашф этилган олтинчи янги минералдир. Мамлакатимиз янги минерални кашф этган дунёдаги учинчи давлатга айланди», дея маълум қилади Хитой Миллий космик бошқармаси.
Бу кашфиёт Хитой учун Ойдаги биринчиси бўлди.
Маълумот учун, «Чанъе» ой дастури 2004 йилда ташкил этилган ва Хитой ой маъбудаси шарафига номланган. Охирги вақтларда дастурнинг вазифаси Ой юзасидан намуналар йиғишга қаратилган. «Чанъе-7» миссияси Ойнинг жанубий қутбини тадқиқ қилишни режалаштирган.
Bloomber’га кўра, Хитойнинг космик режалари унинг Америка Қўшма Штатлари билан рақобатига сабаб бўлади. Шунингдек, Хитой Ойда халқаро тадқиқот станциясини қуришни ҳам режалаштирган.
Эслатиб ўтамиз, аввалроқ Хитой коинотга сирли «космик самолёт» учирганди.
Шунингдек Хитой «Шенъчжоу» космик кемасини космонавтлар билан бирга орбитал станцияга учиргани хабар қилинганди.